Ugatsha lwe University of Zimbabwe olwe Polititical Science and Admnistration lwethule okuphume kunhlolisiso oluyenze kunsukwana ezedluleyo etshengisa ukuthi uMongameli Robert Mugabe nguye ozanqoba ekhethweni lwakusasa. inhlolisiso le ithi uMugabe unqoba ngesilinganiso sokungamatshumi amahlanu lasikhombisa ekhulwini 57%, kuthi umkhokheli welinye icele le M-D-C uMnumzana Morgan Tsvangirai athole amavoti ayisilinganiso sokungamatshumi amabili lasikhombisa ekhulwini, 27%, uMnumzana Simba Makoni athole amavhoti ayisilinganiso sokulitshumi lane ekhulwini 14%, uMnumzana Langton Toungana athole 0,2%.
Kodwa kunsuku ezedluleyo inhlanganiso ye Mass Public Opinion eyenze inhlolisiso efanayo ithe uTsvangirai nguye ozanqoba ekhethweni. Unobhala jikelele wecele leM-D-C elikhokhelwa nguMnumzana Arthur Mutambara, uMnumzana Welshman Ncube, othi uMugabe kasoze anqobe kulolukhetho ngoba abantu bengasamfuni.
Kunjalo nje umsekeli wesikhulumi secele leM-D-C elikhokhelwa nguMnumzana Morgan Tsvangirai, uNkosazana Thabitha Khumalo, uvumelana loNcube ukuthi ukuhlolisisa okwenziwe yi University of Zimbabwe okuthi u Mugabe nguye ozanqoba kukhetho, kuveza sobala ukuthi yimisebenzi yebandla leZANU PF elokhe ifuna ukuqhubeka inamathele embusweni.