Umongameli Robert Mugabe sechothoze uMnu Simba Makoni emchaza njenge khikhitha lezombusazwe.
Lokhu ngokwakuqala ukuthi uMugabe akhulume phezu kodaba lukaMakoni selokhu exotshwe kuZanu PF kumaviki amabili elduleyo ngemva kokuba eveze ukuthi sefuna umsebenzi kaMugabe.
UMakoni uveze kumaviki ukuthi ubefuna ukuncintisa kusikhundla sokuba ngumongameli weZanu PF kodwa wavinjwa yinkokheli yalelibandla, ngalokhu sencintisa kusikhundla sokudinga umongameli welizwe elilunga elizimeleyo.
Ekhuluma lomsakazo kamabonakude oweZBC izolo uMugabe uthuke wathuka, esithi ngokuhlamukela iZanu PF, ufana nje lekhikhitha elingela lapho elimi khona. Uthi uMakoni ngumuntu ofundileyo kodwa izenzo zakhe ngezomuntu ongelabuchopho obujulileyo.
Uthi imfundo yakhe yiyo emenza abone angani enganqoba kukhetho, khona athi yikuphupha nje libalele ngoba engelabantu abamsekelayo. Imizamo yokuxhuma uMnu Makoni yehlule, kodwa uMnu Ibbo Mandaza asebenzelana laye, uveze ukuthi imbiko kaMugabe ayibaphathi lakancane, esithi uMugabe ahle alungiselele ukutshiya umsebenzi ngoba ezanqotshwa kulolukhetho.
Ingchwethi ecubungula ezombusazwe uMnu George Mkhwananzi utshele uNtungamili Nkomo ukuthi imbiko kaMugabe le ayimfanelanga ngitsho ngoba iyangisa. Uthi uyamangala ukuthi uMugabe uzathi uMakhoni likhikhitha njani laye wabhazuka esuka kuZapu ngo1963 esesiyabumba ibandla leZanu laboMnu Enos Nkala, behlamukela uMnu Joshua Nkomo.