Lamuhla umongameli Thabo Mbeki weSouth Africa uzibonele ngawakhe ukuthi kayisuye wonke umuntu ovumelana lezibopho eziphume kunkulumo zokukhumisana umlotha azikhokhelayo eziphakathi kwamacele womabili eMDC leZanu PF.
Amalunga enhlanganiso edinga ukulotshwa kwesisekelo sombuso esitsha, iNational Constitutional Assembly (NCA) atshengisele eHarare phambili kwakhe uMbeki ethwele amabhakane asola ukuganjelelwa kwesisekelo sombuso. Amalunga la ekade efika amakhulu amane abikwa etshengisele phambili kodwendwe lwemota zikaMbeki ahle achitheka masinyane.
Kodwa kubikwa kubotshwe amalunga alitshumi. Ukuhlaziywa lokwethulwa kwengxenye yesisekelo sombuso lokhu ngokunye kwezivumelwano zenkulumo lezi ezasungulwa yiSadc ukuzama ukuxazulula inkinga zeZimbabwe. Kusenjalo, Mbeki uhlangane lenkokheli yeMDC eHarare egoqela uMnu Morgan Tsvangirai kanye losikhwicamfundo Arthur Mutambara phambilini kokuthi ayebonana njalo lomongameli Robert Mugabe.
Emhlanganweni wakhe lamacele eMDC, uMbeki ubikwa ewakhuthaze ukuthi inkulumo ezikhona phakathi kwawo leZanu PF ziqhutshwe ngesiphangiphangi ziqedwe ngoMpalakazi. IMDC yona ibikwa itshele uMbeki ukuthi atshele uMugabe aqede udlakela olukhona njalo ibifuna ukubakwazi ukuthi vele lona ibandla eliphikisayo lizatholani kulezinkulumo. UMbeki udlule eZimbabwe elubhekise kwele Uganda emhlanganweni weCommonwealth Heads Of Government Meeting (CHOGM).
Osiyazi abakhulume leStudio 7 bathi uMbeki uchayele uMugabe konke okukhulunywe yiMDC eState House lamuhla. Kodwa asenelisanga ukuzwa ukuthi yena ukwamukele njani lokhu ikakhulu udaba lodlakela. Sibelengxoxo lonkosikazi Priscillar Misihayirambwi Mishonga, ongumsekeli kanobhala jikelele weMDC ekhokhelwa nguMutambara oveza okunengi ngomhlangano walamuhla.
Silokhu sikudaba olufanayo, unobhala jikelele wecele elikaTsvangirai, uMnu Tendai Biti ube lomhlangano lentathelizindaba ezitshela ngokwenzakeleyo emhlanganweni lo. Lokhu kwenzakala laloba intathelizindaba bezithe zizakhalala ukwethula imbiko ngenxa yokutshaywa kwentathelizindaba ngabasekeli balelibandla.
Kunjalo nje, sibelengxoxo lengcwethi ecubungula ezombusazwe uMnu Mlamuli Nkomo othi yena imbiko kaMbeki eyokuthi inkulumo lezi kumele ziqhutshwe ngesiphangiphangi iveza sobala ukuthi bezingahambi kuhle. Uthi njalo uMbeki yena uthwele nzima ngodaba lweZimbabwe lolu, yikho edlule kulelilizwe ukuze efike azise umhlangano weCommonwealth ngokwenzakalayo ngalezinkulumo.