Inhlanganiso yababalisi eye Progressive Teachers Union of Zimbabwe i PTUZ ithi ababalisi abedlula inkulungwane ezingamatshumi amabili lanhlanu- 25 Thousand batshiye umsebenzi lonyaka kusukela ngenyanga ka January. Ababalisi batshiya umsebenzi ngenxa yeholo eliphansi kanye lokwehluleka ukuqhuba umsebenzi ngemfanelo ngenxa yokusilela kwezinto zokusebenzisa ezikolo. Kodwa i PTUZ ithi ayisibobodwa ababalisi abatshiya umsebenzi kwezemfundo, ama District Education Officers lama Provincial Directors labo babikwa bengabanye asebebaleka elizweni besiya dinga amadlelo aluhlaza emazweni angomakhelwane.
Ababalisi babaleka nje ngemva kokwengezelelwa iholo nguhulumende ngenyanga ka October. IStudio 7 ikhulume loMnumzana Enock Paradzai obona ngokuqhutshwa kwenhlelo ze PTUZ esigabeni seleMandebeleni ovumayo ukuthi ezemfundo sezibhidlikile elizweni.