Isigodlo senkonzo ye Roma ese Vatican namhlanje samukele isicelo sika Archbishop Pius Ncube wako Bulawayo sokutshiya umsebenzi. UArchbishop Ncube use isicelo sakhe kumkhokheli wenkonzo yamaRoma u Papa u Benedict ngenyanga ka July ngemva kokwetheswa icala lokuya emacansini lokuthandana lenkosikazi yomnikazi. Kodwa abasekela u Ncube bathi ukutshiya kwakhe isikhundla sokuba ngu Archbishop sokumkhulule ngoba besimbopile njalo ubesehluleka ukuqhuba eminye imisebenzi yakhe ephathelane lokulwela ilungelo loluntu.
Inhlanganiso ye Pius Ncube Solidatity Trust eyabunjwa ukutshengisa usekelo ku Ncube ithi ukutshiya kuka Ncube isikhundla sokukhokhela inkonzo yeRoma ko Bulawayo sokuzamenza alwele amalungelo kazulu ngamandla. Isikhulumi salinhlanganiso uMnumzana Effie Dlela Ncube, ongumqondisi njalo we Matebeleland Empowerment Services Association uthi benze umhlangano lentathelizindaba ko Bulawayo namhla bekhuluma ngodaba lokutshiya umsebenzi kuka Ncube, esithi bona njengenhlanganiso bazaqhubeka bemsekela icala lakhe lize liyephutsha.
Kunjalo nje unkosikazi Joyce Dube okhokhela inhlanganiso ye Southern African Womens Institute for Migration Affairs i SAWIMA, ongomunye wabaqoqe umthandazo wokusekela u Archbishop Ncube e Johannesburg kwele south africa ngempelasonto edluleyo, uthi u Ncube sokumele angene kwezombusazwe ngoba engumuntu olabantu enhliziyweni yakhe.