Ingcwethi kwezenotho zithi ukwehlisa lokukhweza intengo yezinto okwenziwa nguhulumende kutshengisa sobala ukuthi uhulumende ubevele ehlulekile ngokuletha uhlelo lokwehliswa kwentengo yezinto i Operation Dzikisai mitengo. Lokhu kulandela imibiko eyethulwe ngumphathintambo obona ngezokuthengiselana uMnumzana Obert Mpofu okhokhela njalo ugatsha olukhangela ngezentengo, yokupha imvumo yokuthi intengo yezinto ezigoqela izicathulo zako Bata, ama tyre ezimota, itshukela, amahlamvu etiye, inhlanyelo yomumbu lokunye, iqonge ukuze lezizinto ebesezisilela, zitholakale.
uMnumzana Sam Ncube umqondisi wenhlanganiso ebona ngokuthuthukiswa kwamabhizimisi abensundu esigabeni seMatebeleland, i Affirmitive Action Group , AAG, utshele u Brenda Moyo we Studio 7 ukuthi uhulumende ngabe waqala wahlala phansi labamabhizimisi, inhlanganiso ezizimeleyo labanye abaqakathekileyo ekuthuthukiseni ezomnotho, anduba alethe uhlelo lolu lokwehliswa kwentengo.