Ingcwethi ezicubungula ezombusazwe zithi uhulumende we Zimbabwe uzama ukucatsha ngomunwe nxa esithi iqula lakhe ebelimele liye emhlanganweni we African, Caribbean and Pacific Parliamentarians bemanyene labe European Union- ACP-EU, alisezukuya ngoba lincitshwe amaVisa yi Germany. Ekuqaleni kwayonale iviki unobhala wedale lePalamende uMnumzana Austin Zvoma uthe ababili abe ZANU PF bancitshwe amavisa ngakhoke i Zimbabwe ayisezukuphatheka kulo umhlangano.
Omunye obekuqula leli nguMnumzana Nelson Chamisa isikhulumi secele le MDC elikhokhelwa nguMnumzana Morgan Tsvangirai engumeli we Kuwadzana edale lepalamende, uthi ulakho ukuzihambela emele ibandla lakhe hatshi eyingxenye yequla lika hulumende. Iziphathamandla ze European Parliament zethule umbiko othi uhulumende weZimbabwe kazange avele adingele iziphathamandla zakhe, uMnumzana Godfrey Chipare loMnumzana Forbes Magadu amavisa okuya kwele Germany. Kodwa ngakwelinye icele uMagadu utshele iStudio 7 ukuthi yena ube hambisile incwadi yakhe yokuhambisa esigodlweni sabameli beGermany eZimbabwe wancitshwa ivisa.
Ingcwethi ecubungula ezombusazwe uMnumzana Zenzo Nkomo uthi uhulumende weZimbabwe kala sifiso kangako sokuthi iqula lakhe liye kulo umhlangano ngoba engafuni ukuthi udaba lwe Zimbabwe lukhulunywe emhlanganweni lo.