Amabandla aphikisayo asesole indlela okuqutshwa ngayo ukulotshwa kwamagama abazavota.
Loluhlelo oluhlezi lusenziwa minyaka yonke luyaqala ngoMvulo lapho iziphathamandla zikamsitheli zizaya ilizwe lonke ziloba amagama abazavota labafuna ukuthatha izithupha.
Labo kade bengasavunyelwa ukuvota ngoba belabazali abavela ngaphandle kwelizwe bazabe belobisa amagama abo. Abafuna incwadi zokuzalwa bayabe beziphiwa. Osekucunule abamabandla aphikisayo yikuthi lokhu kwenziwa kungakabiwa iziqinti zokuvota, idelimitation.
Unobhala oqondisa ezokhetho kucele leMDC elikhokhelwa nguMnumzana Arthur Mutamabara, uMnumzana Paul Themba Nyathi utshele uChris Gande weStudio 7 okubakhathazayo ngodaba lolu.
Kunjalo nje, isikhulumi secele leMDC elikhokhelwa nguMnumzana Morgan Tsvangirai, uMnumzana Nelson Chamisa utshele iStudio 7 ukuthi sebethole imbiko yokuthi kwezinye izindawo ukubhaliswa lokhu kulobunzima obuthile.
UChamisa uthi iziphathamandla zikamsitheli zibikwa bezifuna ubufakazi bokuthi umuntu ulilunga leZANU PFandubana ibizo lakhe lifakwe kuluhlu lokuvota. IStudio 7 kayenelisanga ukucazulula limbiko.
Kodwa okhokhela uhlangothi lwabomama kucele leli uNkosikazi Lucia Mativenga utshele uChris Gande weStudio 7 abakwenzayo ngokubhaliswa kwamagama lokhu.