Icele leMDC elikhokhelwa nguMnumzana Morgan Tsvangirai libe lomhlangano omkhulu, weCongress, eSouth Africa ngomgqibelo lapho okukhethwe inkokheli yalelibandla kulelo lizwe.
Lumhlangano owenzelwe emzini weBloemfontein ukhethe uMnumzana Malcom Mutambikwa, ukuba ngumgcinisihlalo. Kodwa kube lokukhonona okukhulu ngoba ezikhundleni ezingamatshumi amabili lasikhombisa kukhethwe abantu abakhuluma ulimi lwesiShona bodwa ngaphandle koyedwa kuphela odabuka emandebeleni, uMnumzana Amon Ndlovu.
UChris Gande weStudio 7 uxoxe loNdlovu, okhethwe ukuba ngumsekeli kamgcinisihlalo. Obekhangela ukuqutshwa kwalolukhetho, ngumgcinisihlalo walelicele elizweni jikelele, umnumzana lovemore moyo. UMoyo utshele uchris gande westudio 7 ukuthi yena uyasuthiseka ngalolukhetho kodwa njengenkokheli bazalalela okukhulunywa nguzulu bathathe amanyathelo nxa kudingakala ukuthi benze njalo.