Umumo osezibhedlela elizweni lokhu uqhubeka usiba mubi kulandela ukukhalala umsebenzi kwabanye odokotela labongi.
Odokotela laba bakhonona ngokuthi iholo labo liphansi ngakho alisoze liyesebenza malanga wonke ngoba imali le ingeneli indleko zenyanga yonke.
UDokotela Tarirayi Gwatikunda, oyisiphathamandla se Hospitals Doctors Association, utshele u Sithandekile Mhlanga we studio 7 ukuthi loba nje inhlanganiso yakhe ingabagconi odokotela abakhalale umsebenzi, bonke bamelele ukukhalala umsebenzi okusemthethweni ngelanga lakuqala kunyanga ezayo ngesizatho esifanayo.
Kunjalo nje, uMnumzana Sam Ncube, ongumgcinisihlalo wenhlanganiso ebona ngokuthuthukiswa kwamabhizimusi abansundu, i Affirmative Action Group, utshele u Sithandekile Mhlanga ukuthi umumo womnotho wonakele okokuthi zonke izisebenzi ezikhalala umsebenzi zidinga ukwengezelelwa iholo azisoze zincedakale ngoba intengo yezinto iyabe ilokhu ikhwela nsukuzonke, kucine kungaselamehluko.