Ababotshiweyo bagoqela u Mnumzana Arthur Mutambara okhokhela elinye icele le MDC leyinye inkokheli yakhe, u Mnumzana Morgan Tsvangirai okhokhela elinye icele leyinye inkokheli yebandla lakhe,u Mnumzana Lovemore Madhuku umqondisi wenhlanganiso elwela isisekelo esitsha sombuso i National Constitutional Assembly i NCA, labanye abacatshangelwa ukuthi bangedlula ikhulu.Izolo abecele lika Mutambara batshone bemdinga labanye abotshwe labo enkambeni ezimbalwa ze Harare baze bamthola phakathi kobusuku,njalo namuhla emini yantambama bebelokhe bephakathi kokudinga abanye babo.
Igqwetha lika Mutambara uMnumzana Harrison Nkomo utshele i Studio 7 ukuthi utshaywe ngamapholisa izolo e Machipisa police station edinga u Mutambara labanye wacina ebaleka etshiya i mota yakhe enkambeni le. U Nkosikazi Priscilla Misihairambwi Mushonga umsekeli kanobhala jikelele walelicele utshele u Brenda Moyo we Studio 7 ukuthi kuze kube namhla emini amapholisa ebelokhe ebalisa ukubonana lo Mutambara yena ose Avondale police station, esithi okwenzakeleyo lokhu akubuyiseli muva umsebenzi webandla.
Kunjalo nje u Mnumzana Morgan Tsvangirai ubikwa etshaywe kakubi ngamapholisa walimala ekhanda. U Mnumzana Lovemore Madhuku owe NCA ubikwa ephuke ingalo walimala ekhanda. U Mnumzana Lovemore Moyo umsekeli kamgcinisihlalo wecele le MDC elikhokhelwa ngu Mnumzana Tsvangirai utshele u Brenda Moyo we Studio 7 ukuthi amapholisa e Borrowdale abalisile ukubonana lo Tsvangirai esithi engxeye besebe sesaba ukuthi abantu bazabona ukulimala kwakhe.
Kodwa umphathintambo obona ngokwethulwa kwemibiko u Mnumzana Sikhanyiso Ndlovu utshele i studio 7 ukuthi uhulumende uzaqhubeka ebopha abamabandla aphikisayo labanye abaphikisana lohulumende abalo budlwangudlwangu esithi babangela ukuxokozela elizweni befuna ukuthabisa abamhlophe baphandle kwelizwe ababanika imali. U Ndlovu uchothoze uhulumende we Melika le Bhilithane ngezijeziso zenotho, ohulumende laba abazethulele ele Zimbabwe, esithi yizo ezibangele ukubhidlika komnotho welizwe.