Abazali abalabantwana abalobulili obungacaciyo sebemanyene lenhlanganiso ezilwela amalungelo oluntu basungula umkhankaso olesihloko esithi “Free to be me” olenjongo yokulimukisa abantu ngamalungelo alaba-bantu ukwenzela ukuthi umphakathi ubemukele.
Inengi labantu abalobulili obungacaciyo lithi liyahlukuluzwa ngumphakathi njalo lokhu kumele kuphele.
UNkosikazi Sithokozile Ndlovu uthi ukungamukelwa komntanakhe ngumndeni lomphakathi sekwamdalela izifo.
Umendo wami wachitheka ngemva kokuba imuli iyale ukwamukela isimo somntanami njalo ngaqala ukugula iBP lenhliziyo ngoba ubandlululo lwakhona kunzima.”
UNkosikazi Hleziphi Hadede uthi waxotshwa lapho ayekhonza khona ngenxa yesimo somntanakhe.
“Umuzi wami wachitheka ngenxa yesimo somntanami saphinda sazoxotshwa ebandleni kodwa ngakhetha ukuma lomntanami ngoba inengi labo liyahlukuluzwa phandle lapha abala lapho abangaqonda khona.”
lsakhamuzi sakoBulawayo UNkosikazi Phathisani Tabengwa usola ukuhlukuluzwa kanye lobandlululo olubhekane lalaba-bantu.
“Umphakathi akumelanga ubandlulule amakey populations kumbe ukubaphatha ngocuku kumele bezizwe beyamukelekile emphakathini labo ngabantu balamalungelo afana lomuntu wonke.”
Umfundisi Ronald Madongwe owenkonzo yeMetropolitan Community Church usola udlakela lobandlululo olujonge amakey populations.
“Njengebandla siyamelana lokuhlukuluzwa kwabantu kungakhathalekile ngezimo zabo ngoba isisekelo sombuso asilabandlululo lokuncindezela ngitsho lemabandleni okholo akumelanga kube lobandlululo”
UMnu. Munyaradzi Mnkandla obona ngokuqhutshwa kwenhlelo eAdvocacy and Research for Man in Zimbabwe uthi basungule uhlelo lokulimukisa uzulu ngamalungelo ama key populations bemanyene lenhlanganiso ezimbalwa olulesihloko esithi Free to be me ngoba laba-bantu bahlangana lobunzima emakhaya abo lasemphakathini.
“Ukulimukisa uzulu ngobandlululo lokuhlukuluzwa kwamakey population akumelanga kwenziwe phakathi kwe16 Days of Activism Against Gender Based Violence kodwa sikhathi sonke ngoba laba bantu bahlukuluzwa njalo nje emakhaya langumphakathini.”
UNkosikazi Monica Mutsvangwa umphathithambo obona ngendaba zabesifazana lentuthuko uthi uhulumende weZimbabwe wenza konke okusemandleni akhe ukumelana lodlakela kanye lokwephulwa kwamalungelo oluntu.
Inhlanganiso ezigoqela i Association of LGBTI People in Zimbabwe (GALZ) Voice of the Voiceless (VOVO) lezinye ezweni yizo ezizaqhuba uhlelo lweFree to be me.
Your browser doesn’t support HTML5
UAnnahstacia Ndlovu Uyalandisa