Izakhamizi zesigabeni seMasiyephambili eTsholotsho zithi zikhangelele ukuguqula impilo yazo kulandela ukusungulwa kohlelo lokulima ngokuthelezela olulakho ukuzinika inzunzo ebambekayo zingalima kuhle amatamatisi, ikhabitshi lokunye okuthakazelelwa nguzulu. Uhlelo lolu lusekelwa luhlangothi lukahulumende weMelika olubona ngezentuthuko olweUnited States Agency for International Development kumbe iUSAID.
Sokulungiswe umhlabathi kwafakwa impompi zamanzi okuthelezela kwasekuhlanyelwa usaba lwamakhabitshi oluzinkulungwane ezilitshumi - 10,000 esiqintini seMcetshwa esigabeni seMasiyephambili, okulohlelo lolu oluqhutshwa phansi kolubizwa ngokuthi Amalima Loko, olusekelwa luhlangothi lukahulumende weMelika olweUSAID. Sokuhlanyelwe njalo usaba lwamatamatisi oluzinkulungwane eziyisithupha - 6,000 okukhangelelwe ukuba kungalinywa kuhle okuzatholakala kuzathengiselwa uzulu emikambo koBulawayo lezinye indawo. Bayaluthakazela kakhulu abalimi uhlelo lolu. UNkosikazi Filida Tshuma, ongusobhuku eMcetshwa njalo oyingxenye yamalunga ohlelo lolu, uthi kulemizi engamatshumi amane - 40 elima endaweni le okwagejwa isibholani kwafakwa lamatanka amanzi.
"Amalima Loko yasincedisa ukuthi sifeze amaphupho abanye bathi bafuna imigodi emibili eMcetshwa, kwathi Manyika yona bathi bafuna owodwa. uthe kugejiwe owe Mcetshwa kwatholakala ukuthi kulamanzi amanengi kakhulu.
Kwasokutholakala ukuthi vele akulangadi ngitsho eyodwa eyenutrition ngoba bekulomgodi owodwa ngapha imizi ifika 113 babona ukuthi amanzi manengi kakhulu bathi kungcono siliyenzise i-irrigation."
Umngcinisihlalo wekhomithi ebona ngokulima eMcetshwa Irrigation Scheme, uMnumzana Thembelani Khumalo, uthi kabakhangelelanga ukuthola amabele okudla kuleyondawo kodwa bafisa ukuthengisa abazakuthola ukwenzela ukuzithuthukisa.
"Sikhangelele ukuthi abantu bathole ama cent wokuziphilisa okokudla singakuthola kodwa inhloso yikuthi siqhube irrigation leyi as a business not for consumption kahle kahle sifuna ukuqhuba amathuba womsebenzi"
UKhumalo uthi bakhangelele ukuthola imali enengi ekulimeni amakhabitshi lamatamatisi.
"Sihlanyele amakhabitshi ayinkulungwane ezilitshumi 10,000 sikhangelele ukuthi singavuna between 9,000 and 10,000 siwathengise nge10 rand elinye sithole kubo 90 to 100,000 rand kuthi amatamatisi lawo yi 150 rand ibhakede thina sikhangele ukuthi njengoba sihlanyele 6,600 plants nxa ephume kuhle singathola more than 40 000 rands imali esizayigaba."
Amalunga ohlelo lolu abhadala itshumi lamadollar imuli yinye ngayinye eyokuthenga inhlanyelo njalo babuthanisa imali efanayo okwenyanga ezintathu ukwenzela ukuthuthukisa iMcetshwa Irrigation Scheme. Kunengi okufiswa yizakhamizi zakulindawo. uNkosikazi Nozipho Tshuma yena uthi ufisa ukubhadalela abantwana imali yezifundo kunzuzo azayithola ekuthengiseni izilimo lezi.
"Sifuna ukuthola imali yokufundisa abantwana bedlule izinga leli esikolo. Abantwana bethu eTsholotsho abafundanga ngenxa yokuswela. Nxa usulemali into yonke isuka ibelula kulokulimela ukudla kwendlini kuphela."
Kunengi kulez'insuku okunceda izakhamizi endaweni le. UNkosikazi Judith Tshuma uthi isibholani lesi sibancede ngokubalethela amanzi eduze njalo lezifuyo sezinatha khona.
"Sincedakale kakhulu ngoba besile borehole eyodwa kodwa abantu bedlula ikhulu bekungeneli bewufika ulayine njalo kungathathwa ngama bhakede amanengi ukwenzela ukuthi abanye labo bathole."
UNkosikazi Deliwe Nkomo yena uncoma uhlelo lweAmalima Loko esithi lwabenzela lula ngokufaka impompi ezingamatshumi amane phakathi kwendawo yokulima ngokuthelezela.
"Basenzela kwabalula kakhulu ukuthi basifakele impompi ezingengi basinike lama hose pipe okwenza singathandabuzi ukuzothelela, kwenza singaviliphi ngoba akulanto enzima ngokuthelela ngehosepipe"
UNkosikazi Sifikile Sibanda uyakusekela lokhu.
"Amanzi kade esihlupha sibili besihamba imango emide ukuze sithole amanzi obesokwenza silale singagezanga singosi ngcoli ngcoli lokuwatsha besingawatshi lezifuyo ngapha lazo zitholile amanzi siyabonga Amalima Loko ngalokhu esiyenzele khona."
Umqondisi weAmalima Loko uMnumzana Dominic Graham, ephendula ngokulotshiweyo, uxwayise abalimi ukuthi belime amatamatisi, ibutternut lamakhabitshi ukwenzela ukuthi bethole imali enengi. Uphinde wathi ukubambisana kwabo leUSAID kunceda kakhulu ekuthuthukiseni abalimi kanye leleZimbabwe.
Your browser doesn’t support HTML5
UNgqwele Dube Uyalandisa