Imbiko eyethulwa lugatsha lwezempilakahle phakathi komnyaka wonalo esesiwugqiba oka 2024 ibiveza ukuba uhulumende ubebhekane lobunzima obugoqela ukulwisana lemikhuhlane ehlukeneyo, ukusilela kwemithi ezibhedlela, lokulahla amajogwe okwenziwa ngezinye izisebenzi zikahulumende zisiya dinga amadlelo aluhlaza kwamanye amazwe.
Ngenyanga kaNtulikazi lonyaka ugatsha lwezempilakahle lwabika ukuba umkhuhlane wesihudo usuphelile ngoba sekulensuku ezedlula amatshumi amabili lasitshiyagalombili (28) kungazange kube lomuntu oyedwa ohlaselwa yiwo. Kodwa uphinde waqhamuka njalo edolobheni leKariba, mhlaka 4 ngenyanga kaLwezi njalo usuhlasele phose ikhulu labantu kulelodolobho.
UDokotela Nhlonipho Precious Sithole Sibanda osebenza kukhansili yakoBulawayo ekhangele uhlangothi lwemikhuhlane ememethekayo ulandisa ngesihudo kulelodolobho.
“KoBulawayo sibe lama case angu 13 awe Cholera, senelisa ukuba siyinqande. Sananzelela ukuba okwenza imemetheke kakhulu yizinto ezinjengamanzi enganeliyo. Ebesizama ukuthi sikwenze yikufundusa abantu ukuba babambe njani amanzi wonala amalutshwane. Okunye okwenza ukuba imemetheke ngama poor hygiene practices, lama sewer lawa adubukayo engaze a reporter. Okunye obekusisiza yikubana sivele silo hlupho lwesihudo koBulawayo ngokunjalo kusenza sinanzelele masinya nxa kulohlupho lwesihudo.”
Dokotela Sithole uchasisa langomkhuhlane weMPOX.
"Omunye umkhuhlane engingakhuluma ngawo osuze wafika leZimbabwe ngowe MPOX. Lowu umkhuhlane besiwulungiselele, sa trainer ama health workers ethu ukuba bawunanzelele nxa ufika koBulawayo. So far elizweni silama case amabili, kodwa labo sebesilile. Kodwa njengoBulawayo asila ama case aweMPOX, sa trainer ama clinics onke kuhlangene lama central hospitals labama uniformed forces ukwenzela ukuthi siyinqande kalula.”
UDokotela Maphios Siamuchembu umqondisi wogatsha lwezempilakahle edolobheni lakoBulawayo uthi kuleminye imikhuhlane egoqela imvukuzane ethwalise abantu nzima.
“Umnyaka ka2024 ubunzima nxa sikhangela uhlangothi lwezempilakahle. Kusweleke amanzi, sahlaselwa ngumkhuhlane we Cholera. Uzulu ulayo njalo eminye imikhuhlane ehlanganisela umkhuhlane we cancer, nxa sikhangele i cancer lakhathesi lokhe kungela umtshina we radiotherapy esibhedlela sethu seMpilo. Okutsho ukuthi abantu abadunga ukwelatshwa abalutholi usizo, imithi ye chemotherapy lokhe itholakala idura abanengi bengayikwanisi. Khathesi sikhangelele ukuthi sibone ukuba i ministry ye health and childcare ile plan bani njalo izathola imali ethe thuthu ku budget ezasincedisa ukuthi silwisane lemikhuhlane etshiyeneyi.”
Impi yegcikwane leHIV layo ikhanya ilukhuni ngoba uhulumende ememezele ukuba akuselamali yokuthenga amakhondomu.
TEXT: UNkosikazi Linnet Mashava umongi koBulawayo uthi umnyaka ka2024 ubulukhuni kuzisebenzi zikahulumende ngoba iholo lingeneli Indleko zazo.
“Umuntu uyathi esemsebenzi kodwa ecabanga ukuthi kanti ngingenza ma deal bani ukuze imali ihlangane eyokuphilisa imuli. Umuntu kahlali e wardini, uzabe ebhoda ezama ukuthengisa khonapha emsebenzini. Iqiniso yikuthi abantu bahamba emsebenzini be demotivated, siyakwazi ukuthi abantu bathi onurse ba rough. Okunye kwalokhu yikuthi ama salaries awakwani lutho. Nxa uhulumende engakunanzelela konke khonokhu akulungise, kungenza lathi sithuthukise izinga esisebenza ngalo abantu bathole usizo olugcweleyo.”
Ezinye izisebenzi zogatsha lwezempilakahle ziqhubeka zisiyadinga amadlelo aluhlaza kwamanye amazwe njalo eziselizweni sezicebise uhulumende ukuba akhuphule iholo lazo ukuze kuthuthukiswe ugatsha lolu. Izisebenzi zithi njalo kufanele imithi ingasileli ukuze abantu bathole usizo olugcweleyo ezibhedlela.
UNkosikazi Clementine Sithole umhlali wakoBulawayo uthi abathola usizo olugcweleyo esibhedlela ngabalemali.
“I health service yethu iphansi kakhulu njalo asitholi ncedo olwaneleyo. Uyathi ubhadele i consultation fee e clinic ungaphiwa lamaphilisi. Sekumele uyethenga futhi ema pharmacy. Uyathola ukuthi abantu abadala lanxa beselatshwa mahala kodwa amanye amaphilisi abawanathayo kufanele athengwe. Okucina kusenza abalemali bathole ukwelapheka, kodwa nxa ungela yikumelela ukufa endlini."
Ekhuluma emhlanganweni obucubungula imali esetshenziswa kuhlangothi lwezempilakahle, umphathintambo walologatsha uMnumzana Douglas Mombeshora wagcizelela ukuthi uhlupho yikusilela kwemali.
Kukhangelelwe ukuba ugatsha lwezempilakahle luthole isilinganiso esingaba litshumi lanhlanu ekhulwini (15%) minyaka yonke, kumali evela kugatsha lwezemali. Kodwa ngomnyaka ka2024 umphathintambo wogatsha lwezemali uMnumzana Mthuli Ncube wabela ugatsha lwezempilakahle isilinganiso esiphosa sibe litshumi ekhulwini (9,8%).
Your browser doesn’t support HTML5
UBathabile Masuku Uyalandisa