Abasakhulayo abalwela ukunanzwa kwamalungelo abesifazana bathi isinqumo esathathwa ngumthethwandaba we High Court esokuba umthetho uvumele ukukhitshwa kwezisu kubantwana abancane labo mama abadlwengulwa besemtshadweni uyindlela enhle ekuphakamiseni amalungelo alabo abasakhulayo, lanxa abanye bekusola lokhu.
Lokhu kuza ngemva kokuba inhlanganiso eyeWomen in Law in Africa yaphanyeka udaba lolu emthethwandaba isithi kumele abesifazana ikakhulu abasakhulayo bavunyelwe ukukhipha izisu nxa bedlwengulwe besemitshadweni lokuba abantwana abangamankazana bonke abaleminyaka ephansi kwelitshumi lasitshiyagalombili-18 bavunyelwe ukukhipha izisu.
Idale lavumelana lakho lokhu lisithi ingxenye yomthetho we Termination of Pregnancy Act 2 isigaba (1) kawuhambelani lesisekelo sombuso welizwe ngoba awuvumeli ukuba omama benze intando yabo ngemizimba yabo.
Abasakhulayo abakhulume le Studio 7 bathi isinqumo esethulwe lidale samukeleke kakhulu.
Omunye oveze lokhu ngu Nkosazana Hilda Mpala owenhlanganiso ye Young Women Arise.
‘’ Sithabe kakhulu njengabo mama abasakhulayo ngesinqumo esithethwe lidale le High Court ngoba kuzakwenza ukuba omama abasakhulayo benelise ukufeza amalungelo abo ngemizimba yabo lapho bethe badlengulwa’’
Lokhu kusekelwe ngu Nkosazana Nomusa Mlilo owe Women’s Rights Association yena othi isinqumo esithethwe lidale sihambelana lesikhathi.
‘’ Umthetho lowu kade sawumelela kuleli ngoba amalungelo ethu njengabomama abasakhulayo kawahlonitshwa awokuba sizitsholo ukuba sifuna abantwana loba hatshi. Yimizimba yethu le njalo kumele sizikhethele’’
UNkosikazi Pauline Zinyama oliqgwetha yena uthi umthetho lowu uzancedisa kakhulu.
‘’ Umthetho lowu uzancedisa abasakhulayo ngoba bekunzima ukuba bakwenze lokhu ngokusemthethweni kucina kusenza ukuba bedale abacala bekhipha izisu emikotweni, kubafaka engozini’’
Kodwa abanye abasakhulayo bathi umthetho lowu ulakho ukwengenza inani labatsha abaphatheka emacansini isikhathi singakafiki. Omunye wabasole lokhu ngu Nkosazana Nomqhele Dube ongumfundisi.
‘’ Lokhu kulakho ukudala ukuba amankazana asakhulayo eqale ukuya emacansini isikhathi singakafiki. Mina kangiwusekeli umthetho lowu ngoba uyaphazamisa abantwana abangamankazana’’
Usekelwe ngosakhulayo uMnu.James Sibindi yena othi imthetho efana lalowu ovunyelwe lidale le High Court iphazamisa isiko lenkolo zabantu be Zimbabwe.
‘’ Esintwini vele kuyazila ukukhipha izisu, angikwazi ukuba abantwana bakuthatha ngaphi lokhu. Kumele bazibambe bamelele ukuthathwa hatshi lokhu’’
Umthetho we Termination of Pregnancy Act kungakaphiwa isinqumo lesi ubuvumela kuphela abantu abadlwengulwayo ukukhipha izisu ngemva kokuthola incwadi ka dokotela, lapho okulengane engabelethwa iphazamisekile lalapho okulakho ukuba impilo yomzali ibesengozini.
Lokhu bekudala ukuba abanye bacine bekhipha izisu ngokungekho emthethweni obe kutshiya inengi labo lisengozini enkulu.
Inengi labo mama abasakhulayo lithi lifuna ukuba lamandla okwenza elikufunayo ngemzimba yalo kungakho selijabuliswe yisinqumo lesi.
Your browser doesn’t support HTML5
UMlondolozi Ndlovu Uyalandisa