Ele Zimbabwe selibekwe kunombolo yamatshumi amathathu-30 kuluhlu lwamazwe afika ikhulu abikwa engahloniphi amalungelo oluntu, okuveza ukuthi lalo lihamba phambili kulokho, kuphenyo olwenziwe yinhlanganiso elwela ilungelo loluntu eye CIVICUS.
Ele Zimbabwe lona elibikwa lilodumo lokuba ngelinye lamazwe angahloniphi amalungelo oluntu ledlule kuphela ele Angola (28) lele eSwatini (9) emhlubulweni owe SADC.
Uphenyo lwe CIVICUS lolu lwasungulwa ngomnyaka ka 2017 njalo luhlolisisa amalungelo kundaba zokwethulwa kwemibiko, ukubuthana kwabantu lelungelo lokubumba inhlanganiso ezehlukeneyo emazweni afika phose amakhulu amabili-198.
Uphenyo lwalonyaka belukhangela amazwe alikhulu kusukela ngo Zibandlela kuze kuyefika uLwezi.
Ingcitshi zithi okubangele ukuthi ele Zimbabwe libe phansi kangaka kundaba zamalungelo ngumkhuba webandla elibusayo ele ZANU PF lona elibopha labo abaphikisayo, njengalokho okwenzakala ele Zimbabwe lisiya emhlanganweni we SADC summit lonyaka.
Abantu abagoqela uMnu Jameson Timba labanye abasekela ibandla le CCC babotshwa ngoNhlangula bahlala ejele okwesikhathi eside.
Abalwela amalungelo oluntu ababalisa oMnumzana Robson Chere, lo Samuel Gwenzi kanye loNkosazana Namatai Kwekweza bathunjwa egcekeni lendizamtshina eRobert Mugabe airport bacina sebesezandleni zamapholisa.
Olwela ilungelo loluntu uMnu Charles Nyoni owasebenza lowanyamalala ngo2015 uMnu Itai Dzamara uthi uphenyo lolu luqondile.
Your browser doesn’t support HTML5
UMlondolozi Ndlovu Uyalandisa