Izakhamizi ezigabeni ezitshiyeneyo zemaphandleni eHwange laseNkayi, enyakatho yeMatabaleland, zithi isimo sendlala siqhubeka sisiba sibi ngamandla kulezindawo nanku lokudla ezikuholiswa nguhulumende kulutshwane kakhulu futhi akufinyeleli wonke umuntu okudingayo.
Ngokutsho kwezakhamizi, abantu abaholiswa ukudla lugatsha lukahululumende olweSocial Welfare kulezindawo ngabampofu, intandane, abafelwakazi, asebekhulile kanye labakhubazekileyo.
Umuntu ngamunye uphiwa amabele alesisindo samakilogram ephezudlwana kwayisikhombisa, 7.5 kgs kuphela.
Usobhuku esigabeni seNduna uMvuthu, uMnu Paulos Ntini, uthi ngaphandle kokuthi kulutshwane lokhu kudla, balihlekana abantu abakuholayo.
Njengomzekeliso, uthi phakathi kwemizi engamatshumi amathathu, 30, esebhukwini lakhe, kuhola eyisikhombisa kuphela, 7.
“Kungenwa ngokuthi emulini libangaki umuntu uphiwa igalani, kodwa indlala ikhona kuye wonke umuntu yikho ngithi lolenkomo kakwanisi ukuthi uyayithengisela bani njengoba bencidezekile ekuthengiseni ngesizatho se climate change. Sesithembele ukuthi line abantu abathengise ngokuqondileyo,” kutsho uNtini.
Ohlala esigabeni seBH26 eHwange, uMnu Ability Moyo uthi abeSocial Welfare bayaphuza njalo ukuholisa abantu, futhi lomumbu wabo kwesinye isikhathi uyabe uphehliwe.
“Bayahamba three months besithi bayenzela ukuthi ukuthi bethole ixesha lokuthi banike kwezinye indawo. Siqala basipha umumbu obolileyo khathesi basiholise ingqoloyi kodwa seyaphela sesithenga. Sesibafuna bebuye ngoba izulu seliseduze ukulima kuzabanzima umuntu elambile,” kutsho uMoyo
UNkosikazi Ketie Mabhena, yena ohlala eSimbo, emangweni weNkayi uthi sokukubi kakhulu emzini wakhe.
“Sidla ekuseni, uphekele abantwana iporridge besiya esikolo kubuya kuyaphinda iporridge isitshwala sidla ntambama.”
Isakhamusi saseMkhayeni uNkosikazi Cathrene Ncube uthi sebephila ngokuncedisana ngobukhelwane babo.
“Abe social welfare sebahamba so ukuze siphile yikho khonokho. Ukuthola kwabantu kutshiyene njalo abanye abalabantwana bokubasiza abanye ngabathatha izidakamizwa so yikho kuabalulekile ukuthi sihlale siphana.”
Umphathintambo kahulumende obona ngokwenzakala eMatabeleland North, uMnu Richard Moyo, uthi udubo olukhona ngolokuthi abatshayeli abathwala ukudla bekusa ebantwini abavumi ukubhadlalwa nguhulumende ngemali yakuleli, iZIG.
“Abantu bengazikhuphela ama dollar njengoba ama transporters ekhala ngokuthi banikwa iZIG, so uhulumende usebavumele ukuthi bekhiphe ama dollar asiboni hlupho ngalokho as the leleadership.”
Inhlanganiso ezizimeleyo ezabela abantu ukudla kwezinye izigaba azilanhlelo kulezizigaba.
Indlala ephehlwe yisikhudumezi seEl nino ihlasele abantu abayizigidi phose eziyisitshiyangalombili, 7.7 million eZimbabwe lonyaka, ngokutsho kwenhlanganiso yeUnited Nations ephathisa abalambayo ngokudla emhlabeni jikelele, iWorld Food Program.
Linhlanganiso, eqhuba inhlelo zayo kuleli ibambisane logatsha lukahulumende wakweleMelika olweUSAID kanye lohulumende waseZimbabwe, ithi abantu laba bazadinga usizo lokudla kuze kuyefika ngoMbimbitho emnyakeni ozayo ka2025.
IWFP ithi ihlose ukuphathisa abantu abayizigidi phose ezimbili, 1,8 million ngokudla kusikhatshana esilandelayo njalo ithi ukuze ikufeze lokhu idinga izigidi zamadola ezedlula amakhulu amabili US$201 million.
Umphathintambo wezemali uMnu Mthuli Ncube ngeviki edluleyo wazise ukuthi uhulumende uhlelo imali engange-813 million ZiG azayisebenzisa ukuselela abalambayo ngomnyaka ozayo abafika phose izigidi eziyisitshiyangalombili, 7.9 million.
Uthe njalo inhlanganiso ezizimeleyo ezisebenzisana lohulumende zona zizaphathisa ngezigidi zaseMelika ezedlula inkulu, US$110 million.
Ngaphandle kokudlisa abantu luklubhu, indlala ihlasele lezifuyo kanye lenyamazana zasendle. Uhulumende uthi isibulele inkomo ezedlula inkulungwane ezingamatshumi amahlanu, 50,000 elizweni lonke lonyaka.
Your browser doesn’t support HTML5
Udaba esilwethulelwa nguNokuthaba Dlamini