Inengi lezizalwane zakweleSouth Africa zilutshaye indiva ubizo lokuthi zibe yingxenye yokutshengisela kulelolizwei jikelele okubizwe ngamaqembu angajabuliyo ngokuphatheka kwabantu bokuza kumabhizimusi amancane lemisebenzini engadingi makhono aphezulu.
Endaweni phose zonke kweleSouth Africa abantu bebephatheke ngemisebenzi yabo yansuku zonke bengazihluphi ngobizo lokuthi kuvalwe konke kube lokutshengisela kwensolo yabokuza abaselizweni. Abebengaphathekanga laba bebengathandi ukutsho ukuthi yindaba bengabanga yingxenye lobanje ebulenjini be internet inengi belikhala ngokuthi kufananje lokuchitha isikhathi.
Kodwake endaweni yeVaal ezansi yeJohannesburg, kule hlekana labaphume bayatshengisela. Abebetshengisela laba bavale imigwaqo ngamatshe batshisa lamathaya besithi akuxotshwe bonke abokuza ezitolo ezisathuthukayo ezidume ngokuthi ngama Spaza kweleSouth Africa.
Bathi zonke lezi izitolo kufanele ziphathwe yizizalwane zakweleSouth Africa. Omunye wabebetshengisela laba uMnumnzana Michael Maleka ongumgcinisihlalo wenhlanganiso yeOperation Dudula ePretoria uthi akuzwisiseki ukuthi kungathi inengi labantu bengasebenzi emalokitshini, uhulumende abesevumela abokuza bethatha amaSpaza okuyiwo angaphilisa abangasebenziyo.
“Into esiyifuna kuye uGNU no Cyril ngokwakhe uPresident yikuthi ma kacabange kahle ukuthi into azikhulumayo ziyakhoneka na. We are not saying mabahambe. Sithi abeze la ecountrini legally. Those who are illegal mabaphume kahle straight president siyakucela do that. NgeCovid wasithumela amasotsha. But manje siyamangala abantwana bayafa awuthumeli amasotsha.”
EPretoria kulehlekana labebetshengisela elihlangane eChurch Square enzikini yedolobho. Laba bona bebesithi bafuna umongameli Cyril Ramaphosa ehle esihlalweni ngoba nguye ovulela abokuza ukungena kweleSouth Africa bezoqeda amathuba. Obekhokhela leli iqula uMnumzana Simadimela Tshwene utshele iStudio 7 ukuthi bathukuthele ngenkulumo esanda ukwethulwa ngumongameli Ramaphosa eyokuthi uzakwenza kube lula ukuthi izizalwane zakweleNigeria zethekelele kweleSouth Africa.
Abanye bebesithi basacasukile ngokwengezwa kwesikhathi samapermit ezizalwane zeZimbabwe aweZEP ngoba lokhu kutsho ukuthi bazaqhubeka besenza imisebenzi okufuze ithathwe yizizalwane zakweleSouth Africa. UMnumzana Tshwene uthi lobanje eyephuke inhliziyo ngokungaphatheki kwabantu abanengi kulokhu kutshengisela, ababuyeli emuva ngokuthi umongameli Ramaphosa ehle esihlalweni.
“Sifunu kuthi igovernment ize ne law, yokuthi certain categories of businesses of economic activities kumele zenziwe ngabantu bala eMzansi kuphela. Amaforeigners must not own spaza shops for instance.”
Intathelizindaba yeZimbabwe uMxolisi Ncube uthi ukungasekeli kwabantu ukutshengisela lokhu kukhombisa khona ukuthi akusizo zonke izizalwane zakweleSouth Africa ezizonda abantu bokuza.
“AmaSouth Africans amanengi amaresearch asekhulumile even kusiya kuma elections iresearch yabonisa ukuthi abantu baseSouth Afrika bakhathazeke kakhulu ngezinto ezifana lemisebenzi hatshi abantu bokuza.”
Lobanje uhulumende engaphawulanga ngokutshengisela kwalamhlanje, umongameli Ramaphosa ngesikhathi ephawula ngokuthi kuzenziwa kube lula ukungena kwamaNigeria elizweni, wathi lokhu kuzathuthukisa inhlelo zokwethekelela ilizwe le South Africa lezamabhizimusi. Ekwengezweni kwesikhathi samapermit eZEP, umphathintambo wogatsha lwendaba zasekhaya uMnumzana Leon Schriber wathi wathatha lelinyathelo ngoba efuna ukulandela umthetho engakenzi isinqumo ngesiphetho sala mapermit. Edabeni lwamaSpaza, uhulumende uthi bonke abalamaphepha asemthethweni labalelungelo lokuqhuba amabhizimusi balemvumo yokwenza lokhu ngoba yikho okutshiwo yisisekelo sombuso.
Your browser doesn’t support HTML5
UThuso Khumalo Uyalandisa