Ingcwethi zithi isinqumo seUnited Kingdom esokuvimba ukuthi eleZimbabwe libe lilunga leCommonwealth siveza obala ukuthi uhulumende akaqakathekisi ilungelo loluntu.
EleUnited Kingdom, lithi iZimbabwe kumele ithuthukise ukulondolozwa kwamalungelo oluntu kanye lombuso wentando kazulu kuqala.
Abaqoqa inhlelo zeCommonwealth bebekhuthaze ukuthi iZimbabwe yamukelwe njalo kuphiwe amalunga alinhlanganiso isikhathi sokuthi aphe imibono yawo ngaloludaba.
EleBhilithani lithi iZimbabwe ayikalandeli inkuthazo yeCommonwealth Election bserver mission kulandela ukhetho olwaqhutshwa nyakenye.
Iwofisi ebona ngobudlelwano be UK lamanye amazwe ithi isikhathi sokuthi iZimbabwe ibuyele kulinhlanganiso kulandela ukukhutshwa kwayo ngomnyaka ka2002 asikafiki njalo ikhuthaza ukuthi udaba lolu luhlolisiswe njalo ngomnyaka ka 2025 ukuthi kungabe sekulenguquko engenza eleZimbabwe lamukelwe.
Asenelisana ukukhuluma lohulumende weZimbabwe ngaloludaba kodwa isikhulumeli sikamongameli welizwe, uMnu George Charamba watshela iStudio7 kusikhatshana esedluleyo ukuthi eleZimbabwe alilamfutho wokubuyela kuCommonwealth.
Ingcwethi yezombusazwe uMnu Rejoice Ngwenya utshele iStudio7 ukuthi kuzakuba nzima ukuthi eleZimbabwe libuyele kuCommonwealth njengoba uhulumende engazinikelanga ukuguqula izenzo zakhe.
Your browser doesn’t support HTML5
Ingxoxo loMnu Rejoice Ngwenya.