Idolobho leHwange laziwa ngokugaya amalahle ka getsi njalo izakhamizi zalindawo zithi zithwelenzima ngezinga lentuthu ebangelwa ngezokwenjiwa kwe coal, abathi sekubangele imikhuhlane efana leyofuba kanye leyesibeletho kwabesifazana ngezizatho zokusebenzisa amanzi angahlanzekanga.
Yimvama ukubona umkhathi ugubuzele, njalo ongaziyo engathi liyezi lezulu, kanti luthuli lwamalahle. Lomkhathi nje utshisa bhe, okokuthi ngesikhathi sebusika umhlabathi ulumatha amalahle, kulimale abanengi.
Izakhamizi zeHwange zithi uthuli lolu luqhamuka kuma ash dam eZimbabwe Power Company, kumankampani ama China, kanye lemgwaqweni ehamba amagonyethi ethwele amalahle.
Sixoxe loNkosikazi Rejoice Ndlovu ohlala eLwendulo, othi loluthuli selubangele imikhuhlane eminengi.
UNkosikazi Primrose Sibanda we Number 1 Village uthi imgwaqo ifile.
UNkosikazi Sithembinkosi Ndlovu, omele ihlanganiso elilihlo likazulu, izimele, eye Greater Hwange Residents Trust, othi izigaba zothuli lolu zikabili eyomkhathi leyamanzi. Uthi labantwana bezikolo basengozini.
Sixoxe loNkosikazi Thobekile Shoko okunhlanganiso ye Centre for Natural Resources Governance yena othi abesifazane labantwana yibo abasengozini ngothuli lolu. Uthi abazama ukuphakamisa amakhanda bayabotshwa njalo lezincwadi zama petition ngaloludaba kaziphendulwa.
Sixoxisane njalo lokhansila we Ingagula uMnumzana Brian Chikumbo,oveze ukuba inengi kalihlolwa umkhuhlane wofuba kubalela labasebenza emgodini yamalahle le.
Uthi kuyakekube lemizamo, lakho nje gqo, eyokuba kuthelwe amanzi okuthambisa loluthuli lodwa isixazululo yikuba kuvulwe imigwaqo emitsha ibekhatshana labantu kanye lezimayini lazo zibe kude.
Sixhumane njalo lomholi obona ngezehlakalo zesabelo se Matabeleland North, uMnumzana Richard Moyo ngaloluhlupho.
Ngokutsho kwenhlanganiso ye Community Working Group on Health, abantu abedlula inkulungwane eziyisithupha bayafa ngomkhuhlane wofuba kweleZimbabwe, ikakhulu abasebenza emigodini.
Amakhosikazi eHwange athi akholelwa ukuba lelinani lifitshane, nxa beqathanisa labadlula kikho, uhlupho nje yikuba akulamtshina ohlola izakhamizi lumkhuhlane.
Abe Community Working Group on Health, bathi lokhu kungenqatshelwa nxa uhulumende engaqinisisa umthetho lemfundiso kuzulu akuze avikeleke.
Abenhlanganiso ye East Central Southern African Health Community bathi uthuli lolu lubangela ufuba, ilakhulu i pneumoconiosis.
Uhulumende eminyakeni emihlanu edluleyo, wanikeza amankampani abalela ele China izithupha zokwemba, ikakhulu amalahle eHwange, ngenhloso yokuthola inzuzo yezigidi zamatshumi amahlanu edola leMelika -US$ 40 billion kwezenjwayo kusiyabamba umnyaka ka 2030.
Your browser doesn’t support HTML5
UNokuthaba Dlamini Uyalandisa