Kuqhubeka kusiba lemizamo emazweni afana leBotswana kanye leSouth Africa ukuthi amathuba emsebenzi asuke ezandleni zabokuza, abagoqela abeZimbabwe, avulelwe izizalwane zalawo mazwe okuzabangela ukuthi impilo iguquke kulabo abaphila ngaphandle kwelizwe.
Udaba lwamathuba emsebenzi aphiwa abokuza emazweni afana leBotswana kanye leSouth Africa luqhubeka lusegudwini, njalo luke lwahlafunwa kumadale ephalamende amazwe womabili emalangeni asanda ukwedlula.
KweleBotswana, ilunga ledale lephalamende elimela ibandla eliphikisayo eleUmbrella for Democratic Change, uMnumzana Dithapelo Keorapetse uthi sesifikile isikhathi sokuthi kuhluzwe indlela okuqhatshwa ngayo abokuza.
UMnu. Keorapetse ubehlasela umphathintambo wogatsha lukahulumende olubona ngezemisebenzi kweleBotswana, uNkosikazi Annah Mokgethi ngemibuzo.
“Uyakwazi yini ukuthi bakhona abasebenzayo kungatsha ezitshiyeneyo abayenza imsebenzi engaphathwa yizizalwane zeBotswana. Yindaba sisenza kanje sisithi akulamsebenzi kodwa sinika abavela phandle kwelizwe ama permit.”
UMokgethi yena uthi balendlela abahluza ngayo izicelo zencwadi zokusebenza, ama work permit, okugoqela ukusilela kwezisebenzi ezilolwazi olulethwa ngabokuza.
“Ngizabalisa inhlangothi lapho esisilela khona izisebenzi ezilolwazi. Ezempilo, ulwazi ngezamabhuku iaccounting, omanjinela kanye lezikwicimfundo kungatsha ezitshiyeneyo.”
Elinye ilunga ledale lephalamende ekubandla elibusayo, uMnumzana Mpho Balopi uthi mhlawumbe abokuza abavula amabhizimusi kweleBotswana, kumele bavunyelwe ukuthi baze lezisebenzi zabo.
“Alicabangi yini ukuthi umuntu ovela phandle avunyelwe ukuthi abuye lenani elithile lezisebenzi kungakhathalekile ukuthi ulwazi lolo silalo lapha kumbe asilalo.”
UNkosikazi Mokgethi uthi kunsuku ezilandelayo, uhulumende wakhe uzasungula uhlelo lokuhlolisisa indlela yokuphiwa kwencwadi zokusebenza kanye lokuhlala kweleBotswana.
Kusenjalo, idale lephalamende eleSouth Africa lisanda ukutshelwa ukuthi kulabokuza abafika inkulungwane eziyisithupha (6,000) abasebenza kungatsha ezitshiyeneyo zikahulumende.
Umphathintambo okhangelane lezemisebenzi uMnumzana Mzamo Buthelezi, ephendula umbuzo edale lephalamende, uthe inani leli liphansi kakhulu liyingxenye yokukodwa ekhulwini (0.5%) uma kubaliswa izisebenzi zonke ezikuhulumende kweleSouth Africa.
UMnumzana Nqgabutho Mabhena, ongumngcinisihlalo wenhlanganiso yeZimbabwe Community in South Africa, uthi isimo sokufiphala kwamathuba emsebenzi sadalwa yikuqhamuka kwegciwane leCovid, elabona amanye amankampani atshiyeneyo evalwa emazweni amanengi.
“Imsebenzi iya incipha kweleBotswana leSouth Africa. Lokhu kwenziwa yikuthi amazwe lawa kawakatholi isisumbululo lokhe kwaba yi Covid yona eyabangela ukuthi amakampani avale.”
UMnu. Mabhena uqhubeke esithi kulezinye izizatho ezidale ukudonsela kumathuba emsebenzi.
“Okunye siyananzelela ukuthi abaqhatshi bafuna abantu abavela phandle ngoba bebanika imali encane. Okunye njalo ibandla elibusayo ele ANC lathola amavoti ngenxa yodaba lwabantu bokufika.”
Ukuncipha kwamathuba emsebenzi emazweni afana leBotswana le South Africa, lapho inengi eleZimbabwe eliphephela khona, yikho osekudale ukuthi kube lokufuthelana kwezokuqhatsha izisebenzi.
Amazwe womabili asengezelele imikhakhanso ngabomthetho yokugudula bedinga izisebenzi zokuza ezingelamaphepha aqondileyo, kungenwa endaweni ezitshiyeneyo ikakhulu ezokudlela lezinye lapho okwande abantu beZimbabwe khona.
Your browser doesn’t support HTML5
Umqondisi Dube Uyalandisa