Umsekeli kamongameli uNkosikazi Kamala Harris lowake wabangumongameli uMnu Donald Trump bazahlangana ngoLwesibili ePhiladelphia kungxoxompikiswano yabo yakuqala eyokhetho lukamongameli.
Ingcwethi zithi ingxoxompikiswano le ilakho ukuveza ukuthi ngubani ozanqoba kukhetho.
Kubandla leRepublican Party uMnu Donald Trump, uzama ukubuyela esikhundleni sokuba ngumongameli ngemva kweminyaka emine.
Kubandla leDemocratic Party uNkosikazi Kamala Harris, usanda kungena kulumncintiswano njalo uzulu uyazibuza ukuthi uzakhethwa na ukuba ngumongameli.
Ingxoxompikiswano yabazangena kukhetho lukamongameli le eqhutshwa kulandela inguquko ebekhona kwezombusazwe lokunye ikhanya sengathi izakuba nzima.
Ingxoxompikiswano kaTrump eyokucina yakhupha uMongameli Joe Biden kulumncintiswano ngemva kwamaviki ambalwa.
Umnu Biden wazisa ukuthi akasoze ancintise kukhetho lukamongameli, wadedela umsekeli wakhe uNkosikazi Harris osezahlangana loMnu Trump.
Kodwa ingcwethi zithi ingxoxompikiswano le iqakathekile kakhulu njalo ilakho ukutshiya abanengi sebekhethe ukuthi bazavotela bani kukhetho lukamongameli
Ababili laba baza lemibono etshiyeneyo kulingxoxompikiswano.
UTrump uthi umongameli Biden uhlakaniphile ukwedlula uHarris, ngakho uthi lingxoxompikiswano izakuba lula kuye.
“Uhlakaniphile ukwedlula uHarris. Ukuthi bayimelele lingxoxompikiswano?”
Nangu uHarris, ekhokha umoya ngesikhathi elungiselela lingxoxompikiswano
“Sekuyisikhathi sokuthi sime ukudonselana njengelizwe. Sokumele sibambane sakhe elakusasa."
Ingxoxompikiswano kaTrump loBiden ngoNhlangula yabukelwa ngabantu abedlula izigidi ezingamatshumi amahlanu, 51 million lapha eMelika.
Ingcwethi zikhangelele ukuthi banengi abazabukela lingxoxompikiswano njalo iqakathekile kakhulu kwababili laba abazangena kukhetho lukamongameli.
Ofundisa ekolitshini le Wake Forest University uthi ababili laba kuzamele batshengise ukuthi bayenelisa ukukhokhela ilizwe.
“UTrump kumele aveze ukuthi uyenelisa ukuba ngumongameli, njalo kumele atshengise abantu ukuthi uyenelisa ukuveza imibono yakhe engathuki nxa ezakwenelisa ukuthola usekelo lwabavele bengamsekeli. UKamala Harris laye kumele atshengise abantu ukuthi uyenelisa ukuziphatha njengomongameli, ukuthi uyenelisa ukuhlasela kanye lokuzibamba. Kumele aveze ukuthi uyenelisa ukwahlukanisa imibono yakhe lekaBiden, kodwa elokhu elandela okumelwa libandla lakhe.”
Abaphatha lingxoxompikiswano bazabuza ababili laba imibuzo ngendaba ezimqoka ezifana lenotho, amalungelo abesifazane abazithweleyo, ubudlelwano lamanye amazwe phakathi kokunye. Ababili laba bazaphiwa usiba, iphepha lamanzi kanye lemizuzu emibili eyokuphendula imibuzo. UMnu Jeremi Suri, ofundisa eUniversity of Texas eAustin uthi ababili laba bazathola ithuba lokupha uzulu imibono yabo
“Ingxoxompikiswano le ipha ababili laba ithuba lokutshela uzulu ukuthi kuyini abafuna ukukwenza bengachazanga ukuthi bazakwenza njani. Kodwa balakho ukucelwa ukuthi bachaze imibono yabo le.”
Ingxoxompikiswano le ikhangelelwe ngabanengi eMelika.
Your browser doesn’t support HTML5
Udaba Lwamalungiselelo engxoxompikiswano.