Izikolo zivuliwe ngoLwesibili abazali besithi babhekane lobunzima obukhulu ngenxa yesimo somnotho esilakho ukuphazamisa elakusasa labo.
Lokhu kuza ngesikhathi kuqala ithemu yesithathu, ilizwe libhekane lobunzima obukhulu ngenxa yesimo somnotho.
Kunje idola lakuleli ele ZiG liqhubeka lisiwa isisindo njalo izikolo ezinengi zidinga ukuba abazali babhadale imali yesikolo ngedola le Melika.
Abazali abanengi bathi iholo labo alikhutshulwa kodwa izikolo zilokhe zikhweza indleko zifuna ukuba ihambelane lentengo yempahla.
Abazali abakhulume le Studio 7 baveza ukuba ukuvulwa kwezikolo kwe themu yesithathu-le sekubatshiye bemadolo nzima ngenxa yesimo somnotho.
Omunye wabazali abakhulume lentathelizindaba ngu Mnu. Makhosi Mdlongwa isakhamuzi seHarare.
UMnu. Mdlongwa usekelwe ngu Mnu. Cuthbert Sibanda othi ukukhuphuka kwentengo yempahla akuhambelani leholo njalo kuphazamisa ukubhadalela indleko zesikolo.
UMnu. Mlungisi Mabhena uthi ukuwa kwesisindo semali ye ZiG sokubangela ubunzima ekubhadaleni imali yesikolo yona edingakala ngedola le Melika.
Umzali uNkosikazi Nomathemba Muleya uthi kalalwazi lokuthi abantwana bakhe abathathu bazakwenelisa ukuqeda isikolo kumbe kuzehlula phambili.
Kodwa okhulumela uhulumende kugatsha lwezemfundo uMnu Taungana Ndoro uthi uhulumende uyazazi indubo ezibhekane labazali esithi abangela mali kumele babhalise phansi kwenhlelo zika hulumende.
Inhlanganiso ye United Nations Children’s Fund (UNICEF) yethule umbiko othi kulabantwana abafika izigidi ezingamakhulu amahlanu- 500 000 abangayi esikolo ngenxa yokuswelakala kwemali.
Your browser doesn’t support HTML5
UMlondolozi Ndlovu Uyalandisa