Ingcwethi ezicubungula ezomnotho zithi kunengi eleZimbabwe elingakufunda kweleBotswana ekuthuthukiseni impilo yabantu ngemali etholakala kwezemvelo ezifana lamatshe aligugu awamadayimania.
Lokhu kulandela ukuthi eleBotswana lisanda ukuthola ilitshe eledayimana elesibili ngobukhulu emhlabeni jikelele, njalo umongameli Mokgweetsi Masisi walelolizwe uthi bayaziqhenya ngokuthi imali etholakala ekuthengiseni amatshe la isetshenziswa ekuthuthukiseni ilizwe.
Ngemva kokuba eleBotswana libike ukuthi selithole lelidayimana, umongameli Masisi uthe ilizwe lakhe liyaziqhenya ngokuthi imali evela kwezemvelo isentshenziswa ukuthuthukisa impilo kazulu.
“Lokhu kutshengisa umhlaba wonke ukuthi amadayimani kanye lokuphatha kahle ezemvelo kutshoni kithi. Kutsho yonke into kithi.”
Idayimani elisanda ukutholakela kweleBotswana lilesisindo samakharathi aphose abe zinkulungwane ezimbili lengxenye (2,492 carats). Lingelesibili ngesisindo umhlaba wonke jikelele, ngemuva kwelenjiwa emgodini weKimberley kwele South Africa ngomnyaka ka 1905.
Umnotho we Botswana ugxile kakhulu kumadayimani, ilizwe leli lingelesibili ngemva kweleRussia, kubhizimusi yokwemba amatshe aligugu la umhlaba wonke jikelele.
Ngenxa yamadayimani, eleBotswana lasuka ukuba ngelinye lamazwe amahlanu ampofu umhlaba wonke jikelele ngomnyaka ka 1966, lakhuphuka laba lilizwe elinothile uma liqathaniswa lamanye asathuthuka kweleAfrica.
Indlela eleBotswana eliqhuba ngayo uhlelo lokuhlela imali evela kusikhwama sezemvelo, isibone ingcwethi kwezomnotho kanye lezombusazwe zikuqathanisa lokusetshenziswa kwemali evela kumadayimana eZimbabwe.
EleZimbabwe lingelesikhombisa emazweni ayemba amadayimani umhlaba wonke jikelele, kodwa abafana loMnumzana Effie Dlela-Ncube, yena ocubungula ezombusazwe, bathi kunengi elingakufunda kweleBotswana.
“IZimbabwe ingafunda kakhulu kweleBotswana, ukuthi akufanelanga kube le corruption, ukweba kumbe ezemvelo zithuthukise abalutshwane abasesihlalweni inengi lisale lisebuyangeni. IZimbabwe uma ingalandela okweBotswana lamanye amazwe, singathuthuka njenge lizwe.”
Ocubungula ngezomnotho ekweleSouth Africa, usikhwicamfundo Calls Ndlovu uthi eleBotswana lilenhlelo ezicacileyo ngokusetshenziswa kwezemvelo.
“IBotswana yilizwe ngempela elikhaliphileyo ma kufika kwezomnotho wamadayimani. Sibona ukuthi yonke imzila yokuthi eleBotswana lithole kumadayimani sokukhona kweleBotswana.”
UMnu. Ndlovu uqhubeke esithi indlela eleBotswana elaphatha ngayo udaba lokuthi kususwe isigodlo sokuhluza amadayimani eAntwerp kwele Belgium sifakwe kweleBotswana, yisibonelo sokuthi ilizwe leli lizimisele kangakani ukuthuthukisa umnotho.
“Ngaleyo ndlela siyavuma ukuthi kunengi sibili amazwe angakufunda kweleBotswana ukuqhuba ezamadayimani kanye lezomnotho. Uma iBotswana beyibheka ngempela, kukhona abangakufunda ukuthi baqhube njani eyabo imnotho.”
EleBotswana likhangelele ukuthengisa idayimani elisanda ukulithola ngemali ephakathi kwezigidi ezingamatshumi amane kusiya kuzigidi eziyinkulungwane ($40million- $100million).
Imali evela kumadayimani yiyo ephethe umnotho weBotswana, njalo isebenza ukuthuthukisa okufana lenhlelo zempilakahle, ukwakha imigwaqo, imfundo yamahala ezikolo zikahulumende, kanye lokubona ukuthi uzulu ulamanzi ahlanzekileyo kanye lamagetsi.
Lanxa eleZimbabwe lilizwe lesikhombisa kuluhlu lwamazwe ayemba amadayimani umhlaba wonke jikelele, kulokukhonona ukuthi kulutshwane okutholwa ekuthengiseni amatshe la okuthuthukisa impilo kazulu.
Owayengumongameli umuyi, uMnu. Robert Mugabe wake wethusa abanengi esithi izigidi lezigidi zemali efika i$15billion, eyayivela ekuthengiseni amadayimani ayenjiwa eMarange, yanyamalala esikhwameni sikahulumende.
Your browser doesn’t support HTML5
UMqondisi Dube Uyalandisa