Inkampani yakweleMelika esebenzisa i-satellite ukwethulela abantu amagagasi e-internet eyeStarlink isiqalile ukusebenza eZimbabwe.
Inkampani le ilemitshina elentengo ezitshiyeneyo, njalo uzulu uyenelisa ukuthenga imitshina ebiza amadola angamakhulu amathathu lamatshumi amahlanu akwelemelika, $350, abe esebhadala i-$50 ngenyanga.
Abantu bayenelisa njalo ukuthenga ebiza amadola akweleMelika angamakhulu amabili $200, abe esebhadala i$30 ngenyanga.
Ababhadala imali le bathola i-inthanethi engapheliyo okwenyanga, umahluko okhona phakathi kwemali lezi yisiqubu sokuxhumana ngamagagasi la.
Ingcwethi zithi ukusebenza kweStarlink eZimbabwe kuzaletha inthuthuko ikakhulu emaphandleni njalo kwehlise imbadalo ye-inthanethi elizweni.
EleZimbabwe liphakathi kwamazwe alitshumi lane ase-Africa asesebenzisa i-Starlink.
Amazwe asanda kuqala ukusebenzisa iStarlink agoqela eleBotswana, South Sudan, leSierra Leone.
Umqondisi wenkampani ebona ngokuxhumana kukazulu kusetshenziswa amagagasi e-inthanethi eyeWozatel Communications uMnu Robert Ndlovu uthi abantu bayenelisa ukubambana bathenge imitshina le bendawonye.
Your browser doesn’t support HTML5
Ingxoxo loMnu Robert Ndlovu.