Abahlali beKariba abalitshumi lane bakhululiwe ngoMvulo entolongweni ngemali yesibambiso eye bail, ngemva kokuvalelwa okwenyanga. Babotshwe ngoNhlangula besetheswa icala lokuphatheka emhlanganweni ngenjongo yokubangela udlakela, kutsho amagqwetha abamelayo awenhlanganiso yeZimbabwe Lawyers for Human Rights.
Phakathi kwabakhululiweyo kuloMnu. John Roland Houghton, owayelilunga ledale lephalamende emele iKariba, oleminyaka yokuzalwa engamatshumi ayisikhombisa lasitshiyagalolunye 79.
Lokhu kwenzakala amalunga ebandla leCCC awabotshwa kulungiselelwa umhlangano weSADC labalwela ilungelo loluntu belokhe bevalelwe amajele ehlukeneyo inengi lingatholi imvumo yokukhululwa ngemali yesibambiso eyebail.
Kusenjalo, amapholisa athi kusobala ukuthi uMnu. Happymore Chidziva owebandla leCCC usebalekile kulandela icala aletheswayo elokudlwengula untombazana oleminyaka elitshumi lasithupha oyisihlobo lonkosikazi wakhe.
Isikhulumeli samapholisa uMnu. Paul Nyathi utshele iStudio 7 ukuthi sebedinge uMnu. Chidziva, yena omela iGlenview edale lephalamende endaweni ezimbalwa lapho ayake ahlale khona kodwa abamfumani.