Uhulumende weZimbabwe emanyene lenhlanganiso yamazwe omhlaba eyezempilakahle eyeWorld Health Organisation –W-H-O uthi umkhuhlane woqhuqho oweMalaria ulokhe uludubo kuleli ngakho abantu abahlale beqaphele bezivikele kuwo.
Umkhuhlane weMalaria ubikwa uyiwo ohamba phambili elizweni njalo ulakho ukuhlasela abantu abedlula izigidi ezinhlanu, five million, futhi uyiwo obalabantu abangamatshumi amane ekhulwnini-40 percent abafinyelela ezibhedlela besiyakwelatshwa.
Lokhu kuvezwe ngabe W-H-O besebenzelana lohulumennde weZimbawe osekubangele ukuba abezempilakahle bakhuthaze uzulu ukuba ahlale ezivikele kulo umkhuhlane.
Ingcwethi kwezempilakahle udokotela Mandla Vhundla, ongu Epidermiology and Disease Control Officer koBulawayo kugatsha lukahulumende lwezempilakahle uchaza kabanzi ngomkhuhlane woqhuqho- imalaria.
"Umkhuhlane wemalaria ubangelwa ligciwane elithwalwa ngamathe eminyane ensikazi ebizwa ngokuthi yiAnopheles. Ingakuluma iyatshiya igciwane egazini lomuntu njalo ulakho ukuyithola imalaria ungahlatshwa yinalithi ehlabe umuntu olegciwane lemalaria kumbe ungaphiwa igazi lomuntu olegciwane lemalaria."
UDokotela Vhundla uchasisa izibonelo zemalaria.
"Izibonakaliso zemalaria ziqala ukubonakala ngemva kwensuku ezilitshumi kusiya kwezilitshumi lanhlanu. Umuntu uyaqala ukungezwa kahle emzimbeni, etshaywa likhanda, ezizwa egodola kumbe ukutshiselwa okungachasisekiyo, ukubanjwa yisiyezi lokuphefumula nzima. Abanye uma isimbambe kakhulu ijwabu lamehlo abalombala olithanga kanye lokopha okungacaciyo."
Uqhubeke wathi umkhuhlane wemalaria ulakho ukuthatha umphefumulo womuntu kodwa uyelapheka njalo uyavikeleka.
Udokotela Vhundla usekhuthaze abantu ukuthi bezivikele bengakayi endaweni ezilomkhuhlane wemalaria umnyaka wonke.
"Umuntu ulakho ukunatha amaphilisi avikela imalaria iChemoprophylaxix engakayi kundawo ezaziwayo ezweni kumbe emazweni ukuba zilemalaria.Sikhuthaza abantu ukuba belale bezivale ngengubo ezivikela ukulunywa yiminyane ama mosquito nets, ukugcoba amakha axotsha iminyane, lokutshisa imithi ebulala iminyane kuhkanganisa lokuhlala ezindlini ezilamafasiteli angangenisi iminyane."
Isakhamuzi seJambesi eHwange uNkosikazi Fikile Mudimba ubonga uhlelo lukahulumende lokubalimukisa ngemalaria isikhathi sonke kanye lokubapha amambule eminyane.
"Umango wakithi uleminyane ebangela imalaria ngakho isikhathi esinengi uhulumende uyasincedisa ekuvikeleni ukubamba imalaria ngenhlelo ezehlukeneyo. Kunsuku ezedlule bebehamba befeza umuthi obulala iminyabe ngoba thina isihlupha umnyaka uqala uze uyephela."
Isakhamuzi sakoBulawayo uNkosazana Febby Nkiwane othenga ethengisa inhlanzi eBinga ubika ukuba uhlala ezivikele ukubamba imalaria.
"Ngivame ukuyawoda inhlanzi eBinga, kodwa vele sengafundiswa ngokuhlala ngizivikela ukubamba imalaria ukuze ngingaguli."
I-malaria yelatshwa ngamaphilisi abalisa iArtemisinin, Chloroquine lePrimaquine kodwa emhlabeni jikelele sekusiba lodubo lokuthi amaphilisi la awasasebenzi kuhle osekudale ukuba abeW-H-O balimukise uzulu ngokusebenzisa kuhle imithi yokuvikela imalaria lokuphuma lolwazi olutsha lokwelapha lumkhuhlane.
EZimbabwe imalaria ibikwa ihlasela kakhulu eMatabeleland North, Mashonaland Central, Mashonaland East, leMasvingo.
Ingcwethi kwezempilakahle zithi imalaria ihlupha sonke isikhathi kodwa ngesikhathi sezulu yikho lapho ehlupha khona kakhulu kusukela ngenyanga kaLwezi kusiya kwekaNkwenkwezi.
Odokotela bathi umuntu engaphuzelwa ukwelatshwa imalaria ulakho ukulahlekelwa ngumphefumulo ngoba icina ibulala izitho zomzimba ezibalisa izinso, isibindi ingqondo njalo uyabe esesehluleka lokukhuluma eseqhatsha.
Sebekhuthaze uzulu ukuba azivikele andubane aye kuzigaba zelizwe ezihamba phambili ngokuhlaselwa yiMalaria.
Your browser doesn’t support HTML5
UAnnahstacia Ndlovu Uyalandisa