Ezinye izizalwane zeZimbabwe ebezifunda kweleUkŕaine, ezibalekele impi eqale phakathi kwalelolizwe leleRussia ngomnyaka ka2022, zithi seziqhubeka ngezifundo zazo ngemva kokubhalisa emakolitshini asekhaya. Kodwa ezinye zithi lokhe zilangazelela ukubuyela phetsheya ziyeqedisa izifundo zazo.
Ithe iqhamuka limpi, u Tinashe Mafa, oleminyaka yokuzalwa engamatshumi amabili lanhlanu, 25, wayefundela ukuba ngudokotela eVinnytsia National Pirogov Medical University kweleUkraine.
UMafa ungomunye wabafundi bakuleli abalikhulu lamatshumi phose amabili, 118, abahlengwa nguhulumende weZimbabwe baphindela ekhaya kulandela ukuhlaselwa kwele Ukraine ngele Russia ngo2022, empini elokhe iqhubeka.
Uthi ekuphendukeni kwakhe kwakubuvilibana engazi ukuthi enzeni. Kodwa khathesi uMafa uyathokoza ngoba useqhubeka ngezifundo zakhe eUniversity of Zimbabwe, loba nje waphoqwa yilinyuvesi ukubuyela emuva ngomnyaka owodwa, oyikunto athi yamephula umoya ekuqaliseni.
“Impi yaphazamisa izifundo zethu kakhulu ngoba ngahlal iskhathi ngingenzi lutho ngemva iqalile besilethemba ukuba izophanga iphele kodwa sicine sibuya ekhaya sahlala inyanga ezimbalwa ngaze ngathola indawo eUZ.
“EUZ basivumela ukuth siqubeke ngezifundo zethu kodwa inkinga bekumele ubuyele umnyaka owodwa emuva, ngangena eUZ okwamanje ngiyenza kahle sengikumnyaka wami wesine (4) kodwa ekuqaleni bekunzima ngokuhlukana kwendlela okufundiswa ngayo.”
Omunye njalo owayefunda kwele Ukraine osesebenza eZimbabwe ongathandanga ukubethwa ngegama uthi uqedise izifundo zakhe ebulenjini ngoba yathi iqala limpi wayesesalelwe zinyanga ezimbalwa nje ukuthi aphothule.
“Impi yathi isenzakala I was in my last year my final year I was actually left with four months to complete my programme.
iprogramme ngiyiqede ngapha sengiphendukile ngiyi qede online.”
Ugcizelele wathi banengi abangaphendukanga ekhaya ngoba babalekela ukugugudeka komnotho.
"Abanengi bakhona did not come back abanengi basala ngoba kule uncertainty eyokuthi engxenye impi yakhona ingaphela bacompleta amastudies abo besePoland online.
"After completing ama studies they did not pursue their careers mainly due to isituation yeZimbabwe cause istuation ye Zimbabwe asiyazi ukuth iyalunga nini"
Lanxa abanye abafundi sebeqhubeka ngezifundo zabo emakolitshini eZimbabwe, abanye bathi balokhe bezinhlanzi ezitshelwe ngamanzi njalo abazi ukuthi babambe ngaphi batshiye ngaphi.
Umsakazo weStudio 7 uxoxe lomunye wabalokhe bedidekile owesifazana owayefunda eVinnytsia National Pirogov Medical University, eUkraine, laye ongathandanga ukuvezwa ngegama.
Uthi loba nje wanikwa ithuba lokuqhubeka ngezifundo zakhe eUniversity of Zimbabwe, kazange akwamukele lokhu ngoba wabona kumbisela emuva ngemva kokutshelwa ukuthi ngeke aqhubeke lapho ayetshiye khona.
Lumfundi uthi usezama ukudinga indawo kwamanye amazwe aphetsheya, kodwa uthi esikhwameni akuvumi.
“Impi leyi ingibisele emuva kakhulu ngoba bekumele ngiqede ngoZibandlela kumnyaka ozayo kodwa okwamanje sengidinga indawo kwelinye ilizwe eEurope lapho engingaqubeka khona ngezifundo zami ngiqedise.”
Umqeqetshisi wezifundo zokuthapha lokwethula izindaba eUniversity of Science and Technology, uMnu Methuseli Moyo, uthi inhlelo zemfundo ziyatshiyana ngamazwe, okungenza umfundi abuyiselwe emuva uma ebuya kwelinye ikolitshi kumbe ilizwe njengalokhu okwenzakale kubafundi abavela kweleUkraine.
“Into eyenzakalayo nxa kubuye istudent sivela kweyinye balakho ukuth bekhangele ukuth lapho abe efunda imfundo yakhona ukuliphi izinga uyabuyiselwa emuva ayeqalisela esibona ukuthi yikho okumele aqalisele khona yinto yokuthi imfundo vele ayilingani amazwe wonke.”
Obambe iskhundla senhloko yesigaba sesayensi yezenhlalakahle, acting Dean of Social Sciences, eLupane State University, uMnu Mbuso Ndlovu uthi loba imfundo yamanye amazwe ingabe iphezulu akusizi ilizwe nxa abafundi bengaphenduki bezosebenza elizweni labo.
“Nxa bengaphendukanga ekhaya kutsho akusincedi amazwe lawo ayabe ainvesta ku certain field like eUkraine I know ukuth ku medicine yikho aba investa khona kakhulu ekufundiseni amadokotela kulama facilities amahle amanengi besebenzisa itop range equipment lama best scholars in the world nxa bengaqeda bazhlalele ngale akusi ncedi ngalutho.”
Abanye abafundi abadudulwa yimpi yakweleUkraine le abalezimali zabo babikwa sebadinga indawo kwamanye amazwe aphetsheya baqhubeka ngezifundo zabo.
Ngesikhathi limpi iqhamuka ngo2022, uhulumende weZimbabwe uthi kwakulezizalwane zakuleli ezedlula amakhulu amabili lamatshumi amahlanu, 256, ezazihlala kweleUkraine.
Kodwa khathesi akwaziwa ukuthi bangaki lokuthi bakhona yini abalokhe beqhubeka ngezifundo zabo kulelolizwe. Lumsakazo uxhumane labogatsha olubona ngobudlelwano beZimbabwe lamanye amazwe bathembisa ukuphenya.
Your browser doesn’t support HTML5
UNgqwele Dube Uyalandisa