Kubhubhe izizalwane zeZimbabwe ezilitshumi engozini yomgwaqo eMakhado, esabelweni seLimpopo kweleSouth Africa ngemva kokubhewuka kwebhasi yakoMzansi abebeyigadile besuka koBulawayo belubhekise eJohannesburg ngoLwesithathu.
Ngokutsho kweziphathamandla zogatsha lwezokuthutha esabelweni seLimpopo, ingozi ebulele abalitshumi laba abebesuka koBulawayo besiya eJohannesburg, yenzeke phakathi kwamabili ngemva kokuba umtshayeli webhasi yakoMzansi obehamba ngesiqubu esikhulu, ekhwele phezu kwendingilizi yomgwaqo, i traffic circle loba i roundabout, ngolwemzini.
Lokhu kubangele ukuthi ehluleke ukubamba imiqobotsho lomalawula webhasi-le okubangele ukuthi iwe ilale ngogedla. Ngaleso sikhathi-ke kuhle kwafa abalitshumi (10) kwalimala abedlula amatshumi amathathu (30) kukanti abalitshumi lambili babo (12) babangwa lezibi.
Isikhulumeli sogatsha lwezokuthutha eLimpopo uMnumzana Phuti Lekganyane uthi imbiko abayithole emapholiseni abesiza kule inhlekelele isikuqinisekisile ukuthi bonke abafele kule ingozi yizizalwane zeZimbabwe.
“Okunye esikutholayo yikuthi umtshayeli wale ibhasi ubelenyanga eyodwa kuphela engene kulo umsebenzi okungenzeka ukuthi ubengakayazisisi lendawo njengoba ikhanya bha njalo ileziqondiso zomgwaqo ezikucacisayo ukuthi yindingiliza.”
UMnumzana Lekganyane uthi abalimeleyo bahanjiswe ezibhedlela ezitshiyeneyo eMakhado kantike asebedlulile emhlabeni basemakhazeni, ama mortuary endaweni ezehlukeneyo kuleli dolobho. Ubuye njalo wathumela amazwi enduduzo kumndeni yabalahlekelweyo laba.
Izizalwane zeZimbabwe kweleSouth Africa sezethule ukudana okukhulu ngale ingozi.
Umgcinisihlalo wenhlanganiso yeProgressive Zimbabwe Foundation uMnumzana Lance Mlilo uthi kulusizi kakhulu okwenzeke kule ingozi.
“Sithi ayiduduzeke yonke imideni. Lilahlekelwe alilahlekelwanga lodwa. Nathi singabantwana beZimbabwe sithinteke kakhulu.”
UNkosazana Sithembinkosi Sikhosana laye uthi dudu emndenini elahlekelweyo.
“Labo abalimileyo zihlobo zami sicela enkosini ukuthi athobe amanxeba liphile nani. Kungasenani uNkulunkulu uyapha aphinde athathe ngesikhathi sakhe yena afuna ngaso.”
Umgcinisihlalo wenhlanganiso yeZimbabwe Community in South Africa uMnumzana Ngqabutho Mabhena uthi balahlekelwe kakhulu ngokutshiywa ngabalitshumi laba abuye njalo aphe isixwayiso kubatshayeli labanini bamabhasi.
“Loba sisazi ukuthi ingozi ingenzakala loba nini loba ingavelela loba ngubani, esikucelayo yikuthi amabhasi angadlulisi isiqubu okufanele bahambe ngaso esisemthethweni futhi balandele imithetho yemigwaqo ukwenzela ukuthi singalahlekelwa yimphefumulo.”
Imibuzo ebithunyelwe umeli wesigodlo seZimbabwe eSouth Africa uMnumzana David Hamadziripi lo Consul General uMnumzana Eria Phiri ukuthi baphawule ngale ingozi, lokutsho ukuthi malungiselelo bani enzelwa asebedlule emhlabeni labalimeleyo, ibilokhe ingakaphendulwa ngesikhathi sokuya emoyeni.
Your browser doesn’t support HTML5
UThuso Khumalo Uyalandisa