Abalwela amalungelo ezisebenzi abalitshumi lasithupha abenhlanganiso yeAlmagamated Rural Teachers Union of Zimbabwe abagoqela uMnu. Obert Masaraure batholakale bengelacala ngoLwesithathu ngemva kweminyaka emibili kuthiwa batshengisela besola iholo labo njalo bekhalaza ukubhadalwa ngedola leMelika.
Ngakwelinye icele, uMnu. Lukas Slavia owelizweni leCzech Republic owabotshwa ekuqaleni kwayonale inyanga esetheswa icala lokwethula imbiko engasoqiniso, laye ukhululwe eMasvingo.
Kodwa uMnu. Jacob Ngarivhume webandla le Transform Zimbabwe loBishop Kevin Gonde bazaqhubeka bevalelwe ngoba umantshi esithi uzanquma ngoLwesihlanu ukuthi bengakhululwa na ngemali yesibambiso eye bail. Lokhu kuvezwe yinhlanganiso yamagqwetha eyeZimbabwe Lawyers for Human Rights.
Kusenjalo ilunga lebandla leCCC uMnu. Swithurn Chirowodza, othi laye ucitshe wabotshwa, uthi bakhathazekile ngamalunga abo alokhe evalelwe, agoqela uKhansila Bruce Mmeli Moyo weNkulumane koBulawayo.
Your browser doesn’t support HTML5
Ingxoxo loMnu. Swithurn Chirowodza
Isikhulumeli sebandla leZANU PF uMnu. Chris Mutsvangwa usanda ukutshela intathelizindaba ukuthi kwakufanele ukuthi abalwela ilungelo loluntu labezombusazwe bebotshwe ngoba befuna ukutshengisela kulungiselelwa umhlangano weSADC njalo sebengakhululwa okwamanje. Kodwa ukhulume la amazwi ezihlekela njalo akukacaci ukuthi leli linyathelo elizathathwa.