Iyaqhubeka impilo yabantu makhaza elizweni ngemva kokugqitshwa komhlangano we SADC summit eHarare ngempelaviki, abanengi bekhala ngesikhathi sabo abathi basidlaliselweyo. Abe ZANU PF bathabe bamanzi te ngokuthi umongameli Emmerson Mnangagwa uthole isikhundla sokuba ngumgcinisihlalo we SADC.
Abathengisa impahla ezitaladini abakhulume le Studio 7 bathi ukuxotshwa abakwenziwa ngamapholisa ka hulumende lawe khansili sekubatshiye belwisana lobuyanga lendlala ngenxa yesimo somnotho.
Omunye wabakhulume amazwi la ngu Mnu Melusi Mabhena othengisa edolobheni le Harare yena othi waxotshwa edolobheni okwamtshiya engela mali yokusebenzisa phambili komhlangano lowu.
‘’ Usuphelile umhlangano lowu kungela okubambekayo. Saxotshwa ezitaladeni zedolobho leli okwasitshiya singela okukugcina imuli zethu, lanamhla siyakhala ngoba awusenzelanga lutho lumhlangano’’
UMnu. Mabhena usekelwe ngosakhulayo uMnu. Tafadzwa Chiremba yena othi amapholisa aqhubeka exotsha abantu edolobheni.
‘’Umhlangano lowu usitshiye singelalutho kodwa ukuhlukuluzwa kwethu kuphela, lanamhlanje lokhe bekhona edolobheni siyamangala ukuthi kungani besethusela’’
Ingcitshi kwezombusazwe esebenza lebandla le People’s Unity Party (PUP) uMnu Herbert Chamuka uthi lobanje umongameli Mnangagwa esengu mgcinisihlalo we SADC kumele uhulumende akhulumisane lamabandla aphikisayo ukuqeda indubo ezibhekane lelizwe.
'' Kumele kube lendlela zokuthu uhulumende ka Mongameli Mnangagw auyakhulumisa labantu bonke ukuze kudedwe indubo ezibhekane labantu''
Kodwa osekela ibandla le ZANU PF njalo ekunkokheli yebandla leli ko Bulawayo uMnu Teddy Ncube uthi bayajabula ngomhlangano we SADC ikakhulu ukuthola isikhundla kuka mongameli Mnanaggwa athi kuzaguqula impilo yabanengi elizweni.
'' Thina siyathaba ukuthi uMongameli usethethe isikhundla se SADC njalo kutsho ukuba uzaguqula impilo zethu''
Umhlangano lowu uphele ngesikhathi umongameli Emmerson Mnangagwa esengumgcinisihlalo womanyano weSADC loba kulabantu abanengi eZimbabwe abachothoza uhulumende wakhe abathi uncindezela uzulu njalo wephula ilungelo loluntu.
Wamukele isikhundla lesi ngesikhathi kulabaphikisayo abafika ikhulu lamatshumi ayisikhombisa – 170 abavalelwe emajele eRemand Prison abetheswa amacala agoqela awokukhuthaza ukuthi ube lodlakela, abalwela amalungelo besithi kumele bakhululwe.
Babambe owangaphansi abanye abalandela okwenzakala eZimbabwe abathi akumangalisi ukuba inkokheli yeSADC kayikhulumanga ngohulumende kaMnangagwa okuthiwa wephula ilungelo labantu.
Your browser doesn’t support HTML5
UMlondolozi Ndlovu Uyalandisa