Umkhuhlane we Mpox obonakala ngokuqubuka kwesikhumba, usubulele abantu abedlula inkulungwane -1 200 eDemocratic Republic of Congo kuthi abantu abedlula inkulungwane ezingamatshumi amabili 22 000 balawo emazweni agoqela eleBurundi, Central Africa Republic, Republic of Congo, Rwanda leUganda.
Umhlangano weSADC osanda ukugqitshwa eHarare usuphawule ukuba kufanele abaphathintambo bezempilakahle baphange bahlangane bancede eleDRC lamazwe asehlaselwe yiMpox njalo baphume lendlela zokumelana lokumemetheka kwalumkhuhlane, ukuvikelwa kwawo kanye lokulimukisa uzulu ngawo.
Lumhlangano uphinde wakhalaza ukuba iW-H-O incedise ngokuphathisa amazwe asehlaselwe kanye langakahlaselwa.
EZimbabwe umkhuhlane weMpox awukafiki kodwa uhulumende uthi uselungele ukumelana lawo.
Umqondisi wezempilakahle kugatsha lukahulumende lwezempilakahle koBulawayo uDokotela Maphios Siamuchembu uthi sebelungele ukwelapha lokulwisana lokumemetheka kweMpox koBulawayo ngoba lelidolobho liyindlela esetshenziswa ngamazwe la asethe ahlaselwa uma evela kumbe esiya eSouth Africa.
"Umkhuhlane weMpox usuhluphile emhlabeni njalo thina njenge Bulawayo Metro Province sesihleli siqaphele ukumelana lalo umkhuhlane njalo akukabilamuntu osethe wabanjwa lumkhuhlane eZimbabwe kodwa sesizikungisele ukuthi ungaqhamuka sebelise ukusiza abayabe bebanjwe lumkhuhlane sithathe lamanyathela afa eleyo ukuthi ingamemetheki."
UMqondisi wezempilakahle kukhansili yedolobho lakoBulawayo, uDokotela Edwin Mzingwane uchaza ukuthi iMonkey pox ngumkhuhlane bani.
" Umkhuhlane weMonkey Pox ngumkhuhlane olempawu zokuqubuka.okungejwayelekanga kodwa okufana lokwe Small Pox kodwa lapha sesikhuluma ngabantu abazelwe ngaphambi kuka 1979 kanti ke ngabalezi insuku kuphose kufane leChicken Pox kodwa uzathola ukuthi ukuqubuka kwakhona kuthi fe ngendlela ephezulu futhi kuthatha ukuminyana amaqhubu akhona kwathi gqa gqa njengawe Chicken Pox"
UDokotela Mzingwane uchasisa ngempawu zeMpox.
"Impawu zeMonkey Pox, zakuqala yikuthi umuntu uyezwa etshiselwa, kumbe sithi atshiselwe agodole, azizwe edinwa umzimba ephela amandla lemisipha isibabuhlungu amaqhubu qhubu la engakaqali ethi esesithi fe."
Umkhuhlane weMpox uyathelelwana njalo uDokotela Mzingwane uyakuchaza lokho kabanzi.
"Imvama yeMpox yikuthi iyaziphelela kodwa ke ingakazipheleli umuntu ulakho ukuthelela abanye, bacine begula kakhulu okudala ukuthi balahlekelwe ngumphefumulo kodwa abanengi abagula lumkhuhlane bayasila bengelatshwanga kodwa uyingozi kulabo abahamba leminye imikhuhlane yabo ngenxa yokuthi swbwbanjwe yiMonkey Pox "
Kuviki edlule, umabhalane jikelele weW-H-O, uDokotela Tedros Adhonom Ghebroyesus wethule umbiko othi umkhuhlane weMpox usuyingozi emhlabeni jikelele njalo lamankampani alungisa imithi yokwelapha lumkhuhlane sekumele asebenzelane labo ekwelapheni lokwenqabeleni lumkhuhlane.
Ezweni leDRC lumkhuhlane uhlasele kakhulu kuzigaba ezilitshumi lanye zelizwe phakathi kwezingamatshumi amabili lasithupha njalo kule Mpox Clad 1 loClad 11 kuthi iClad 1 yiyo eyingozi kakhulu ngoba ibikwa ibulala futhi isumemethekele kwamanye amazwe.
Your browser doesn’t support HTML5
UAnnahstacia Ndlovu Uyalandisa