Isigaba sakoBulawayo lamuhla simanyene lezinye elizweni lonke ukunanza usuku lwamaqhawe alwela inkululeko yeZimbabwe, olwe Heroes Day. Ekhuluma embuthanweni weHarare emathuneni eNational Heroes Acre umongameli Emmerson Mnangagwa uziqhenye ngomsebenzi wakhe lapho athe uthuthukise ilizwe kwezomnotho lezempilakahle, waletha lenhlalakhale. Uthe uhulumende uzazama ngawo wonke amandla akhe ukulondoloza ababengabalweli benkululeko lemndeni yabo
Umongameli Mnangagwa uthe kulenkulungwane lenkulungwane zezizalwane zeZimbabwe ezafela empini ezilele emagodini angatshoniyo phakathi kweZimbabwe lasemazweni angomakhelwane ezafa zilwela inkululeko okumele ziyegejwa zizongcwatshwa kutsha ukuze imndeni yazo idelise inhliziyo.
Amazwi kamongameli Mnangagwa abalwe ngu Nkosikazi Judith Ncube umphathintambo wedolobho lako Bulawayo obenguye isikhulumi esiqakathekileyo embuthanweni owenzelwe e Provincial Heroes Acre eNkulumane.
Owaye kubutho leZimbabwe National Army njalo engumlweli we nkululeko ekuviyo leZPRA uRt Brigadier General Abel Mazinyane uthi usuku lwamaqhawe uyaluhlonipha
Amazwi akhe agcizelelwa ngu Senator Molly Mpofu wakoBulawayo, laye owalwa kumpi yenkululeko.
Umgcinisihlalo wenhlanganiso yababengabalweli benkululeko eyeZimbabwe National Liberation War Veterans Association koBulawayo uMnu Cephas Ncube uthi inani labanye babo abafayo likhuphuka kakhulu okwesabekayo.
Omunye obekulumbuthano uMnu. Mandla Ncube uthi lanxa izihlobo zakhe zaphiwa inhlonipho yokuba ngamaqhawe kulusizi ukuthi unina katholanga usizo ngesikhathi ephila njalo wafa ehawula engela lutho.
Abanye ababengabalweli benkululeko bebengekho kulumbuthano wokuhlonipha amaqhawe. Omunye wabo nguMnu Baster Willie Magwizi othi kuncedani ukuya embuthanweni lo bona abeViyo leZPRA bengananzwa nguhulumende obusayo.
UMnu Isaac Mabuza laye owalwa empini yenkululeko uthi akuncedi ukujabulela lolusuku abanye babo bedubeka.
UNkosikazi Queen Maligwa uthi akazange ayelwela inkululeko ekuZPRA ukuthi amalungelo abantu ephulwe lokuthi abantu bancindezelwe.
Amazwi ka Nkosikazi Maligwa agcizelelwa ngu Nkosikazi Primrose Mlotshwa omunye umlweli weNkululeko othi usuku lolu lungathakazelelwa ngohlupho olukhona eZimbabwe
Ohlaziya ezombusazwe uMnu Rejoice Ngwenya uthi lanxa usuku lolu kumele uzulu alujabulele, izenzo zebandla elibusayo eleZANU-PF lwenza lube lubi.
Abanye abaphiwe imendulo ngu mongameli Mnangagwa liqembu lezomculo wembube ele Black Umfolosi ngengoma yabo ethi Unity. Umongameli Mnangagwa uthi iculo leli libambanisa isizwe seZimbabwe.
Your browser doesn’t support HTML5
UEzra Tshisa Sibanda Uyalandisa