Uhulumende uthi asesemaphethelweni amalungiselelo omhlangano weSADC Summit okhangelelwe elizweni mhlaka 17 kuyonale inyanga, ngakwelinye icele inhlanganiso elwela ilungelo loluntu eye Concerned Citizens of Zimbabwe isithi isilobele amapholisa incwadi iwazisa ukuthi ifuna ukutshengisela mhlaka 17 kuyonale inyanga isola ukwephula kwamalungelo abantu elizweni.
Ilanga lokutshengisela leli liqondana lomhlangano weSADC Summit lapho eleZimbabwe elikhangelelwe ukuthatha intambo zokukhokhela lumanyano.
Kwabotshwa amalunga ebandla le Citizens Coalition for Change ngenyanga kaNhlangula, labanye abe CCC labalwela ilungelo loluntu kumaviki edluleyo, okubikwa bacatshangelwa ukuthi bafuna ukutshengisela. Inengi lilokhe livalelwe emajele, njalo lincitshwa imvumo yokukhululwa ngemali yesibambiso eye bail.
Okwenzakala eZimbabwe sokusolwe zinhlanganiso ezilwela ilungelo loluntu lamanye amazwe.
Ukuhlaziyal loludaba, sixoxe loMnu. John Zolani Dlamini, umgcinisihlalo webandla leZAPU,
Your browser doesn’t support HTML5
Ingxoxo loMnu. John Zolani Dlamini
Umongameli Emmerson Mnangagwa usanda ukuthi abantu kufanele baziphathe kuhle phambilini komhlangano weSADC njalo uMnu. Kazembe Kazembe, umphathintambo obona ngokwenzakala ekhaya ugcizelele amazwi akhe ngokuthi amapholisa azabopha labo abazabangela udlakela.
Umongameli Mnangagwa waphinda wathi kusobala ukuthi kulabantu abathunywa ngamazwe aphetsheya ukuthi bezophazamisa ukuthula.Usikomitshi wamapholisa uMnu. Godwin Matanga usanda ukuthi kulungile ukuthi amapholisa agcwele ezitaladini ngoba avikele ilizwe njalo abelungiselele ilanga le Heroes Day kanye lele Defence Forces elokunanza imisebenzi yebutho.