Umongameli Emmerson Mnangagwa uthi kufanele umuntu wonke elizweni kanye labezinkonzo bencedise uhulumende ukubona ukuthi umhlangano weSADC ozaqhutshwa kuyonale inyanga eHarare uyaphumelela.
Ukhulume amazwi la ngoLwesithathu embuthwanweni womthandazo eHarare, obuholwa ngumfundisi uAndrew Wutawunashe, labo bishop Nehemiah Mutendi, lo Edmore Chihota.
Umongameli Mnangagwa uqhubeke wathi eleZimbabwe selenelisile ukuthuthukisa inhlelo ezinengi elizweni lanxa letheswa izijeziso zenotho ngamazwe aphetsheya.
Lokhu kwenzakala lanxa ezinye inhlanganiso lamanye amazwe besithi akufanelanga eleZimbabwe liqhube umhlangano weSADC ngoba alinanzi amalungelo oluntu ngokubopha mahlayana labo uhulumende abona engani baphikisana laye.
Kodwa ilunga lebandla leZANU PF uMnu.Mbongeni Dube, owayemela iLupane East edale lephalamende kodwa okhuluma ezimele, utshele uSithandekile Mhlanga weStudio 7 ukuthi ilungelo loluntu alephulwa elizweni njalo eleZimbabwe liqhuba kuhle amalungiselelo alumhlangano.
Your browser doesn’t support HTML5
Ingxoxo loMnu. Mbongeni Dube