Sokungasensuku zatshwala ukuba umhlangano we SADC Summit wenziwe kwele Zimbabwe kulinyanga umongameli Emmerson Mnangagwa uthi kulabantu abaphiwa imali ngamazwe aphandle ukuba baqambe amanga ngelizwe bengafuni ukukhuluma okuhle okwenzakalayo. Lokhu kuza kulokhe kubotshwa labo abacatshangelwa ukuthi bafuna ukutshengisela ngesikhathi somhlangano lowu.
Umongameli Mnangagwa ubekhuluma esemathuneni eHeroes Acre eHarare lamuhla, kungcwatshwa owalwa kumpi yenkululeko ekuviyo le ZPRA uMnu Makhethi Ndebele owayesazakala ngebizo lempini elokuthi Jack Mpofu.
Umongameli Mnangagwa uthe kulabantu abafuna ukubuyisela ilizwe emuva bengakhangeli okuhle osekwenziwe kulungiselelwa umhlangano weSADC.
‘’Baqamba amanga ngelizwe lethu. Kulabantu abathunywe ukuqamba amanga ngamazwe aphandle betshiya okuhle esikwenzayo kumnotho wethu’’
Amazwi kamongameli Mnangagwa aza ngesikhathi sekubotshwe abantu abadlula ikhulu phambili komhlangano we SADC uhulumende athi bafuna ukutshengisela lokuphazamisa umbuthano lo.
Kodwa inhlanganiso ezizimeleyo labamabandla aphikisayo bathi kuyamangalisa ukuba uhulumende wesabani njalo kungani engabophi labo abafuna ukuphazamisa ngokusemthethweni katshi ukubethusela.
Omunye wabakhulume amazwi lawa ngu Mnu Gift Siziba owayekubandla le CCC yena othi kusobala ukuba uhulumende ufuna ukuthatha ithuba le SADC ukwephula amalungelo oluntu.
‘’Inkinga yikuba uMnangagwa kakhethwana ngabantu yikho esebenzisa udlakela lodlame. Akula mzali othi kunje kulabantu be mzini uqale ukubopha abantu. Abantu basemajele kunje ngenxa yamazwi afana lalawa kumele kulungise lokhu’’
Amazwi ka Mnu. Siziba asekelwe yingcitshi kwezombusazwe, ekubandla le People’s Unity Party uMnu Herbert Chamuka.
‘’ Siyakhathazeka kakhulu ukuba uhulumende uhlukumeza inkonkeli yonke ese Zimbabwe ngenxa ye SADC yona eza eZimbabwe. Iyasethusa lindaba ukuba ukuthola isikhundla yikho okwenza ahlukumeze abantu’’
Ngeviki edluleyo, uhulumende ubeke imbiko ethi uzakwenza konke okusemandleni akhe ukuphazamisa imizamo yalabo athi yizitha abafuna ukuphazamisa umhlangano we SADC.
Ekhuluma ngomuyi, umongameli Mnangagwa uthe uMnu. Ndebele wayeyindoda eyayithanda ilizwe layo njalo isebenza ngokuzehlisa okukhulu, esithi abatsha kumele bafunde kumpilo yakhe.
Omunye owafundiswa umsebenzi webutho okhulume ngaye ngu Mnu Headman Moyo owake waba ngumsekeli kamgcinisihlalo wenhlanganiso yabalweli benkululeko iZimbabwe National Liberation Veterans Association.
‘’Waqala umzabalazo esemncane sonke sinje sadlula ezandleni zakhe, yibo abasifundisa ukuba uziphatha njani ukuba lisotsha elipheleleyo. Ube evele emeela abuye eheroes acre’’
UMnu. Moyo usekelwe ngomunye owalwa kumpi yenkululeko ekuviyo le ZPRA uMnu. Jabulani Sibanda.
‘’ Babelobunzima obukhulu, bebancane. Kwakusesabeka ukuqala ukulwa ngemnyaka ahamba ngayo empini, kodwa ngesibindi bazimisela balwa saze sathatha ilizwe’’
Umuyi uMnu. Ndebele wathetshulwa yingwe ngomnyaka ka 1942, waya empini ngomnyaka ka 1967 engomunye wabakuqala abahamba empini elabanye bakhe abagoqela omuyi oMnu Nikita Mangena lo Lookout Masuku, kanye lo Mnu. Ambrose Mutinhiri, omela isigodlo seZimbabe eRussia,
Eseqede ukufundiswa izifundo zebutho walwa endaweni ezibalisa iVictoria Falls lase Hwange lapho atshengisa ubuciko obukhulu.
Umuyi, yena owayekudale laphezulu le ZPRA ele ZPRA High Command ubikwa waba ngowokucina ukubona umkhokheli we ZPRA uMnu Nikita Mangena engakabulawa zinhlamvu okuthiwa zathunyelwa ngabamhlophe.
Ubhubhe ngo Mgqibelo kuviki ephelileyo esemzini wakhe e Cowdray Park ko Bulawayo watshiya umkakhe, indodakazi yakhe labazukulu ababili.
Your browser doesn’t support HTML5
UMlondolozi Ndlovu Uyalandisa