Umsekeli ka Mongameli welizwe uMnu Constantino Chiwenga usekhuthaze amazwe akumanyano we SADC ukuba ame ukuthenga impahla esilungiswe kwamanye amazwe kudala, ngoba amazwe akuzwekazi leAfrica alakho ukuzilungisela impahla yawo lokuzimela wodwa ekuthuthukiseni umnotho nxa engasebenza ndawonye.
UMnu. Chiwenga wethule lamazwi kuvulwa ngokusemthethweni umhlangano wabosomabhizimusi owe SADC Investment Conference owenzakala ngesikhathi somhlangano we SADC Industrial week, owandulela owe summit yalumanyano ozaqhutshwa kuleli ngenyanga ezayo.
UMnu. Chiwenga uqhubeke wathi kumele amazwe la abe lokuzimisela okukhulu ukuze inotho yonke etholakala emhlubelweni lowu isuthise abantu bakulawa amazwe.
‘’Amazwe awe SADC kumele asebenze ukuba asebenze ndawonye kwezomnotho. Kumele siziqhenye sime ukuthenga kwamanye amazwe kodwa senze impahla yethu.’’
Wengeze wathi kumele kube lokusebenzelana phakathi kwamazwe awe SADC ekuvuseleleni umnotho wamazwe lawa ndawonye lokutshala imali.
Uthe kumele amazwe awe SADC abone ukuba izivumelwano azilobelanawo kundaba zamandla ka getsi, ezokuhanjiswa kwempahla, ezokuvakatshelana lezemitshina yakulezinsuku ziyalandelwa ekuvuseleleni umnotho.
UMnu. Chiwenga uthe ku SADC kulabantu abafundileyo, umkhathi ongcono, ukuthula, lendlela zokuhambisa ezilohlonzi athi kumele ziphathise kwezamabhizimusi kuleli.
Emhlanganweni lowu ibhanga elimqoka ele ele African Development Bank (AfDB) lele AfriEXim bank athi azaqhubeka esekela amazwe alitshumi lasithupha awe SADC ukuze athuthukise umnotho wawo.
Ekhuluma emele iAfDB, omkhulu wequla leli uNkosazana Moono Mupotola uthe kumele kubekwe imali ezasekela amazwe awe SADC ukuze umnotho wawo uthuthuke.
‘’ Kumele sibone ukuba siyaseka amabhizimusi emhlubulweni we SADC lokuba siyenza ukuba kube losekelo ngesikhathi sokuguquka ko mkhathi’’
Kodwa ingcitshi kwezomnotho zithi kunzima ukuba amazwe awe SADC lase Africa asekelane ngenxa yezizatho ezehlukeneyo ezifana lokuthi amanye amazwe lawa afana lele Zimbabwe abuyisela amanye emuva.
Enye yalezi ngcitshi esebenza le Zimbabwe Economic Forum nguMnu Ezekial Tshuma yena uthe kunzima ukuba amazwe e SADC asukume ndawonye kwezomnotho.
‘’ Indaba yokuba kube le regional intergration, ukusebenza lokuthengiselana impahla ndawonye inzima ukufeza ngoba amazwe awe Africa asasendulo lapho abakholwa ukuba kumele bavuselele umnotho wabo kuphela hatshi owe Africa’’
Lokhu kusekelwe ngeyinye ingcitshi efundisa izifundo zomnotho ekolitshini ye UZ uMnu Liberty Mguni.
‘’ Umnotho we SADC ungaphumelela kuphela nxa amazwe lawa engasebenza ndawonye, okwakhathesi elinye lelinye ilizwe lenza okwalo akula kubamba ndawonye kwezomnotho’’
Umhlangano wabosomabhizimusi lowu oqale izolo uzaqhutshwa kuze kuyephela iviki kulenjongo yokuba kuvuselelwe umnotho lokutholiswa kwamathuba okutshala imali ku SADC.
UMongameli Mnangagwa uzaphatheka kulumhlangano ngoLwesithathu.
Your browser doesn’t support HTML5
UMlondolozi Ndlovu Uyalandisa