Lamhlanje kuhlandla lethu lengxoxo-mpikiswano, sihlaziya isimo esiselizweni lapho amabandla aphikisayo labalwela ilungelo loluntu abathi abantu abacatshangelwa ukuthi baphikisana lohulumende bayahlukuluzwa njalo bayabotshwa mahlayana phambilini komhlangano womanyano weSADC okhangelelwe ukuqhutshwa elizweni ngenyanga ezayo.
Lokhu kulandela izehlakalo ezigoqela ukubotshwa kwamalunga ebandla le Citizens Coalition for Change ngenyanga edluleyo amanengi awo alokhe evalelwe esitokisini, labafundi abathi batshaywe ngamapholisa ngoLwesithathu.
Umongameli Emmerson Mnangagwa usanda ukuthi abantu kufanele baziphathe kuhle phambilini komhlangano weSADC njalo uMnu. Kazembe Kazembe, umphathintambo obona ngokwenzakala ekhaya ugcizelele amazwi akhe ngokuthi amapholisa azabopha labo abazabangela udlakela.
Sixoxa loMnu. Munashe Mtutsa umabhalane webandla le ZANU PF obona ngogatsha lwe Information Communication and Technology (ICT) njalo elilunga lenkundla ye Central Committee yalelobandla, endawonye loMnu. Comfort Mpofu, umgcinisihlalo wogatsha lwabatsha kanye lezifundi kunhlanganiso ye National Democratic Working Group, ekhokhelwa nguMnu. Job Sikhala, onguye osungula lingxoxo.
Your browser doesn’t support HTML5
Ingxoxo mpikiswano loMnu. Munashe Mtutsa endawonye loMnu. Comfort Mpofu