Isibotshwa seZimbabwe esivele ebulenjeni be internet sigiya ngokuthi sihleli mnandi njalo sithola konke esikufunayo ejele yeSouth Africa, sesivuse intukuthelo enkulu kuzizalwane zalelolizwe lakumphathintambo wogatsha lwezamajele.
Isizalwane seZimbabwe lesi esivalelwe ejele yeGoodwood eCape Town, siphume kumifanekiso kamabona kude ebulenjini be internet sikhombisa injabulo enkulu.
Osekubangele intukuthelo enkulu, ngalo oweZimbabwe owaziwa ngokuthi ngu Bornface Banks njalo ebotshelwe icala lokuthumba, ngamazwi awakhulumayo.
“Linjani lapho. Nxa lisifake ejele licabanga ukuthi siyahlupheka khohlwani. Khangelani ukuthi sijabule njani. Sithola isidlo sekuseni, esemini lesantambama. Asibhadali rent lamagetsi. Sikuthola konke mahala. Sihleli kahle kakhulu asihlupheki.”
Inkulumo yakhe-le isivuse umsindo omkhulu. Inengi lezizalwane zakweleSouth Africa ezikhuluma ngaloludaba ebulenjini, zithi kuyamangalisa ukuthi kungani esebenzisa umakhalekhukhwini okungavunyelwayo kuzibotshwa.
Abanye bethesa uhulumende umlandu besithi nguye ofike waphatha abangene elizweni bezodala amacala ngezandla ezifudumalayo.
Abanye njalo sebesithi ababanjwe babuyiselwe emuva bonke abeZimbabwe ngenxa yalesi senzo soyedwa. Kantike bakhona abathi abokuza abasemajele sekufanele bathwaliswe amalahle ekhanda bengaphiwa ukudla.
Isizalwane sakweleSouth Africa njalo onguye obona ngokuqoqwa kwenhlelo zebandla leSofasonke Party uMnumzana Freeman Bhengu uthi bathukuthele baganunwabo ngesenzo sikaMnumzana Banks okwenze baze bathinta ugatsha lwezamajele bekhonona.
"Syayikhondema and siyigxekile. Sizamile ukuthi sikhulume leDepartment of Police le Department of Correctional Service. Sibatshengisa sibatshela lange video le. Sijabulile ukuthi ama law enforcement ethu athathile iresponsibility, bamfuna and they have taken back icellphone yakhe and reffered his to a much stricter enclosure. Sikhathele ukuthi amaforeigner ma efika la eSouth Africa enze the way afuna ngakhona. This thing by this Zimbabwean prisoner goes to shoe i arrogance nokudelela kwamaforeigners la eSouth Africa.
Okhokhela inhlanganiso yezibotshwa uMnumzana Miles Bhudu uthi oweZimbabwe-lo kuzafuze ajeziswe kakhulu. Kodwake uMnumzana Bhudu uthi kungenzeka utshotshozelwe yizibotshwa zakweleSouth Africa ukuthi enze lokhu.
“Kufanele abanjwe oweZimbabwe lo akhulume ukuthi ngobani abamthume okwenza lesi zenzo sakhe sokweyisa umthetho.”
Kusenjalo umphathintambo wogatsha lwezamajele uMnumnzana Pieter Groenewald laye udla amalahle ngaloludaba.
“Kangeke asakuphinda lokhu. Sesimfake ejele yezigangi ezesatshwayo, imaximum prison. Sesimethese icala futhi lokutholakala lomakhalekhukhwini. Sengilinde ukwazi ukuthi ngobani abalindi abamekele esenza lokhu labo bazawukhomba olotshwala.”
Isikhulumeli senhlanganiso yeZimbabwe Community in South Africa uMnumzana Bongani Mkhwananzi uthi lihlazo elikhulu leli elenziwe ngoweZimbabwe lowu.
"Kube lihlazo leli ukuthi bakhwele emakhanda abantu baseSouth Africa ngokuchoma ukuthi basejele bayakholisa. Kubi lokhu siyakusola kakhulu sikuchothoza ngendlela enkulu kakhulu. Sifisa ukuthi njengoba bemfakile kumaximum prison kanje asibambe mpela isigwebo sakhe mhlawumbe abe nokuzisola."
Ugatsha lwezamajele luthi luphakathi kokwethula ubucwephetshe bakulezinsuku obuzakwenza amagagasi ezokuxhumama ebulenjini be internet engafinyeleli lapho okuvalelwe khona izibotshwa. Luthi njalo luphakathi kokuqinisa ukuhlolwa kwezibotshwa ukuze kungabi khona olomakhalekhukhwini.
Your browser doesn’t support HTML5
UThuso Khumalo Uyalandisa