lzakhamizi zePlumtree zikhala ngokwabelwa umumbu obolileyo lugatsha lukahulumende olwePublic Service Labour and Social Welfare ngaphansi kohlelo lukahulumende kulandela isomiso esibangelwe yiElNino.
UNkosikazi Nomhle Ndiweni-Ngwenya oyinduna uChief Wasi weZimnyama eMangwe uthi sebathola umumbu weSiphala seNkosi kodwa owabelwe uzulu uvela eSocial Welfare wonakele.
Isakhamuzi sePlumtree eMangwe uMnu Mathetha Masuku uthi baphiwe yiSocial Welfare umumbu obolileyo.
Isakhamuzi seMzingwane, uMnu. Thulani Alex Letha uthi abanye batholile umumbu kodwa abanye abatholanga njalo lezifuyo seziqalile ukucuba.
UChief Masuku weGwanda eMatshetsheni uthi indlala ekhona lonyaka kakaze ayibone.
UMnu. Ashley Sithole oyinduna yeTsholotsho uChief Gampu uthi uwutholile umumbu ngaphansi kohlelo lweSiphala seNkosi.
Umholi wekhansili yeziNduna elizweni uChief Mtshana Khumalo uthi zonke induna zizathola amathani angamatshumi amabili lanhlanu.
Obona ngokuqondiswa kwenhlelo ePlumtree, uNkosikazi Rorisang Makhurane uthi izakhamizi ezathola umumbu owonakeleyo kumele ziwubuyisele eSocial Welfare.
Kusenjalo, abanye bayasola uhlelo lukamongameli Emmerson Mnangagwa aluphawule ngeSonto olokukhumisana umlotha ngodaba lweGukurahundi.
UMnu. Tshinga Dube uthi bakhangelele ukuphiwa impahla zabo ezeZPRA leZAPU ezathunjwa nguhulumende.
UMnu. Swithern Chirowodza ophatheka kwezombusazwe uthi umongameli Mnangagwa waphatheka kudaba lweGukurahundi ngakho kalalungelo lokukhokhela loluhlelo.
UMngcinisihlalo weZimbabwe Human Rights Commission uthi ulusizi ngoba ikhomishini ebimele iluphathe loludaba eyokukhumisana umlotha ayisekho.
Umongameli Mnangagwa izolo uthe abantu babe lesineke njalo bebambane ukuze uhlelo lolu lusebenze. Kodwa abanye bathi alusoze luqhubeke kuhle njalo luzafana lezinye inhlelo uhulumende akewaziphatha ngodaba lweGukurahundi, ezifana leChihambakwe Commission okwaphelela emoyeni.
Your browser doesn’t support HTML5
UAnnastacia Ndlovu Uyalandisa