Amapholisa eMelika awohlobo lwe Federal Bureau of Investigation (FBI) athi lanxa ebonakele njalo wabulawa ocatshangelwa ukuthi nguye odubule omunye wabancintisa kukhetho lokudinga umongameli uMnu. Donald Trump, alokhe engakatholi isizathu sokuthi umsolwa ukwenzeleni lokhu.
Uhlamvu lombhobho ludlule luthinta indlebe kaMnu. Trump kancinyane, njalo ubonakale evuza igazi. Uthwalelwe esibhedlela lapho okuthiwe akubanga lomonakalo omkhulu.
UMnu. Thomas Matthew Crooks, oleminyaka engamatshumi amabili, onguye ocatshangelwa ukuthi udubule uMnu. Trump, ubikwa edutshulwe ngamapholisa wahle wabhubha esanda ukudala leli cala.
Ubikwa ubelilunga lebandla lamaRepublicans, okuyilo elimelwe nguMnu. Trump kulolu ukhetho.
UMnu. Crooks ubengumhlali wedolobheni le Bethel Park, esigabeni se Pennsylavania, eduze le Pittsburg lapho uMnu. Trump obeqhuba khona umhlangano weRally.
Umuyi ubikwa ebonakale ekhwela isakhiwo ethwele umbhobho esiyafinyelela ephahleni lwaso lapho afike wadubula ekhona. Abantu babikwa bememezile njalo bazama ukutshengisa amapholisa obekusenziwa nguMnu. Crooks. Bamdubule laye esanda ukudubula.
Amapholisa athi kubhubhe omunye njalo obesembuthanweni lo, kwalimala ababili.
Lokhu kwenzakala ibandla lamaRepublicans likhangelelwe ukuqhuba umhlangano walo we National Convention ngoMvulo okhangelelwe ukugcizelela ngokusemthethweni ukuthi ngempela uMnu. Trump nguye ozancintisa kukhetho.
Ibandla leli lithi umhlangano lo uzaqhubeka eMilwaukee.njalo loMnu. Trump uzaphatheka kuwo. AmaRepublicans athi azadingisisa kabanzi ngokwehlele uMnu. Trump ngoba kukhomba ukuthi ubengavikelekanga ngokupheleleyo.
Ingcwethi ezicubungula ezombusazwe zibikwa zisithi isehlakalo lesi sizehlukanisa kakhulu abezombusazwe kulolukhetho, lapho uMnu. Trump ancintisana khona lomongameli Joe Biden webandla lamaDemocrats.
Ukuhlaziya loludaba, sixoxa loMnu. Tim Muringayi, isizalwane seZimbabwe esihlala eOhio eMelika.
Your browser doesn’t support HTML5
Ingxoxo loMnu. Tim Muringai