Abazancinta kukhetho lokudinga umongameli weMelika, ababalisa uMongameli Joe Biden loMnu. Donald Trump sebeqalile njalo ukukhankasa kulandela ingxoxo-mpikiswano abayiqhube ngeviki edluleyo. Ukudonsa nzima kukaMnu. Biden kwezinye izikhathi kungxoxo-mpikiswano le, kutshiye amanye amalunga ebandla lakhe edinga ukuthi ngubani ongathatha indawo yakhe.
UMnu. Donald Trump lomongameli Joe Biden baqhubeke ngokukhankasa ngeviki edluleyo kulandela ingxoxo-mpikiswano yabo uBiden ezama ukupha abasekeli bakhe igunya lokuthi uzilungiselele ukukhokhela okwehlandla lesibili kulandela ukungaqhubi kuhle kungxoxo-mpikiswano.
"Ngiyalethembisa mpela, bengingasoze ngingene kukhetho lolu ngingelathemba lokuthi ngizenelisa ukuwuqhuba lumsebenzi, ngoba iqiniso ngelokuthi kunengi okungalahleka kulolukhetho..”
Umkhankaso kamongameli Biden wangempelaviki ubulithuba lokuthi aguqule umcabango wabanye abakubandla lakhe elamaDemocrats asebecabanga ukuthi ukungaqhubi kuhle kwakhe kungxoxo-mpikiswano kutsho ukuthi sekumele kudingwe omunye ongamela lelibandla kukhetho.
"Ngabe kulomunye omutsha, oleminyaka ephansi okubandla lamaDemocrats, ngibona sengathi abantu bebezathatha lelithuba ukuvimba uTrump.”
UMnu. Trump uthe ingxoxo-mpikiswano le iveze ukuthi ukhetho lolu ngolokukhetha phakathi kwamandla lobuthakathaka.
"Umbuzo wonke ovotayo afanele azibuze wona namuhla ayisiwo wokuthi uJoe Biden engenelisa ukuma kungxoxo-mpikiswano yemizuzu engamatshumi ayisitshiyagalo lunye-90 na, kodwa ngowokuthi iMelika ingenelisa ukuma okweminye iminyaka emine imenemene uJoe Biden eseWhite House.”
UMnu. Trump utshele abasekeli bakhe ukuthi ubona sengathi uBiden kasoze aphume kulumncintiswano.
"Abanengi bathi ngemva kokuqhuba kukaJoe Biden kungxoxo-mpikiswano uzatshiya lumncintiswano. Kodwa iqiniso ngelokuthi, angiboni kusenzakala lokhu ngoba wenza ngcono kukhetho ukwedlula amanye amaDemocrats wonke abakhuluma ngawo.”
Amanye amalunga ebandla lamaDemocrats okukhulunywa ngawo ukuthi angancinta endaweni kaBiden agoqela, umsekeli wakhe uKamala Harris, ugovernor weMichigan, uGretchen Whitmer, oweCalifornia, uGavin Newsom kumbe oweKentucky uAndy Beshear lowe-Illinois u-J. B. Pritzker.
Phakathi kwabalakho ukungena esikhundleni sakhe akula osekhuthaze ukuthi uBiden atshintshwe. Ukutshintsha omela lelibandla kukhetho kungakaqhutshwa umhlangano weConvention yalelibandla kudinga ukuthi uBiden aphume kulumncintiswano.
“Kuzamele baye eWhite House bayezama ukukhuluma laye ukuthi atshiye njalo kuzakuba nzima ukuthi atshiye. Bengazama njalo ukukhuluma lomkakhe uJill Biden kodwa lokho kunzima ukwedlula ukukhuluma loJoe Biden ngokwakhe.”
Umka mongameli watshela umkhankaso owaqhutshwa ngemva kwengoxo-mpikiswano ukuthi umkhakhe uveze ukuba ngumkhokheli woqotho weMelika.
"Elimbone izolo kungxoxo-mpikiswano nguJoe Biden, umongameli woqotho obekhuluma iqiniso. UDonald Trump ubekhuluma amanga wodwa."
Ucwaningo oluqhutshwe yiCBS News luveza ukuthi abasekeli bebandla lama Democrats bathi uBiden kumele aqhubeke ngokuncintisa kulolukhetho. Isikhwicamfundo sezifundo zombusazwe ekolitshini leMarquette University uJulia Azari uthi umhlangano weConvention yiwo ozathatha lesisinqumo hatshi okuphuma kungxoxo-mpikiswano.
"Ucwaningo lwezombusazwe olukhangela indlela abantu abavota ngayo luveza ukuthi imihlangano yamaConventions yiyo eveza ukuthi abantu bazavota njani ngoLwezi hatshi ingxoxo-mpikiswano."
Umkhankaso kamongameli Biden uqhube umhlangano lamalunga ekhomithi yeDemocratic National Committee ngomhlangano weConvention ozayo. Amanye amalunga ekomithi le atshele abezindaba abe-Associated Press ukuthi umhlangano lo ubuncoma umkhankaso kaBiden njalo ungakhangelanga ukungaqhubi kwakhe kuhle kungxoxo-mpikiswano.
SEE ALSO: Lalela Okugcweleyo Ngaloludaba.