Elinye icele lebandla leCCC lithi amalunga alo angedlula ikhulu abotshiwe lamuhla eGweru ezama ukuxhasa umndeni kamuyi uMboneni Ncube kusikhumbuzo sakhe, bathathelwa imota zabo, bavalelwa esitokisini, njalo amagqwetha asazama ukudingisisa ukuthi betheswa cala bani.
Umuyi wayelilunga lalelibandla obikwa wabulawa ngo2022. Amanye amalunga eCCC edlula amatshumi ayisikhombisa alokhe evalelwe entolongweni njalo ezama ukukhululwa ngemali yesibambiso eye bail. IStudio 7 ayenelisanga ukukhuluma lamapholisa ngaloludaba.
Okunengi ngaloludaba, asikuzweni kungxoxo esiyiqhube loMnu. Promise Mkhwananzi, isikhulumeli salelicele leCCC.
Your browser doesn’t support HTML5
Ingxoxo loMnu. Promise Mkhwananzi
Kusenjalo, amalunga amahlanu awebandla elikhokhelwa nguMnu. Job Sikhala ele National Democratic Working Group akhululwe lamuhla ngemva kokubhadala imali yefayindi engamadola angamatshumi amathathu munye-ngamunye, kutsho isiphathamandla salelibandla uMnu. Darlington Chingwena. Amapholisa athi abophe abahlanu laba eHarare ngoba bedibene ngenjongo yokudala amacala.