Abancintisa kukhetho lokudinga umongameli weleMelika uMnu Joe Biden loMnu Donald Trump badibane kungxoxo mpikiswano eqoqwe ngumsakazo weCNN e-Atlanta, khonalapha eMelika ngoLwesine kusihlwa lapho ababili laba abaphoselane amazwi aqatha bechothozana ngasebakwenzela uzulu abazakwenza bengathwa ngabantu ngoLwezi lonyaka.
Ababili laba bakhulume ngendaba ezitshisayo khathesi eMelika ezigoqela ezomnotho, ezabokuza, umbuso wentando kazulu, izimpi zeUkraine leReussia kanye leyeIsrael leHamas.
UMnu. Trump, wethese uMnu Biden umlandu wokungaphathi kuhle umnotho welizwe, athi sekubangele ukukhuphuka kakhulu kwentengo yempahla, kodwa uBiden ukulandule lokhu esithi uTrump nguye owatshiya ebhidlize umnotho yelizwe.
Kudaba lwempi yeIsrael leHamas, uBiden uthe iHamas ayisela mandla njalo sekumele iqediswe ukuze kungaqhubekeli phambili kulokuxabana. Kuloludaba, uTrump uphendule uBiden esithi usekhuluma njengesizalwane sePalestine njalo esithi akalamgogodla.
Esebuzwa ukuthi uzakwamukela na impumela yokhetho nxa enganqotshwa, uTrump uphendule esithi nxa ukhetho luqhutshwe ngokusemthethweni engamukela limpumela laloba ebeke wabuzwa kabili wangaphenduli. UBiden kuloludaba uthe uTrump uvele ngumuntu ongafuni ukuvuma ukunqotshwa.
Ingxoxo-mpikiswano le eqoqwe ngumsakazo weCNN ngeyakuqala lonyaka njalo iqhutshwe kulandelwa imithetho emitsha ngemva kokuba kube lokuxokozela kungxoxo-mpikiswano yokhetho olwedlulayo.
UTrump ukhangelelwe ukuthi uzancintisa kukhetho lukamongameli weMelika ngoLwezi emelele ibandla lamaRebuplicans, ekhangelelwe ukungqikilana loBiden okhangelelwe ukungena kulolukhetho emele ibandla lamaDemocrats.