Osomabhizimusi ababalisa oMnu. Mike Chimombe lo Moses Mpofu bathi lamuhla bazinikele emahofinisi enhlanganiso ebona ngokwenqabela inkhohlakalo eyeZimbabwe Anti-Corruption Commission (ZACC) yona ethi ifuna ukubaphenya kudaba lwenkohlakalo, kodwa i-ZACC yathi imatasa-tasa okwalamuhla ngakho izababiza kwezinye insuku.
UMnu. Mpofu lo Mnu. Chimombe abakade bebikwa bengekho elizweni kodwa beseChina, bebevele bedingwa yi-ZACC isithi ifuna ukubaphenyak udaba lokuthi bazisebenzisela imali okwakumele ithengele izizalwane zeZimbabwe eziswelayo imbuzi langodaba lokuthengwa kwemitshina yekhetho ngomnyaka odlule.
Imali le yayifika kuzigidi ezingamatshumi amane amadola emelika-40 million US Dollars
Igqwetha elibamelayo, uMnu. Tapson Dzvetero uchasiza okwenzakale lamuhla.
Izizalwane zeZimbabwe lazo seziveze imibono ehlukeneyo ngodaba lokungaphenywa kwababili laba lamuhla zisithi yimvama yeZACC ukubopha okwesikhatshana iphinde ikhulule abantu ngokungacacanga, kukanti ivele ayilamandla okuthonisa amacala lokubabopha ngokupheleleyo.
Ingcwethi ezicubungula umnotho welizwe zithi lapha kungabe kudlalwa ngabantu ngoba bazabayekela icala liphelele emoyeni.
Eyinye yalezi ingcwethi nguMnu. Rejoice Ngwenya.
Olwela amalungelo oluntu, uMnu. Mbuso Fuzwayo uvumelane loMnu. Ngwenya esithi akusathembisi ukuthi ababili laba bazaphenywa.
Isikhulumi sebandla elibusayo, uMnu Farai Marapira uthi kuhle ukuthi oMnu. Chimombe loMpofu bazinikele kuZACC ngoba kutshengisa ukuba balandela umthetho.
Kodwa ingcwethi ecubungula ezombusazwe, uMnu Effie Ncube uthi abantu abaselathemba le-ZACC.
IStudio 7 ayisenelisanga ukukhuluma leziphathamandla zeZACC ezibona ngokwethulwa kwemibiko ngoba zingadobhi ucingo njalo zingaphenduli imbuzo enkundleni zokuxhumana ebulenjini ngodaba lokuzinikela kukaMnu. Chimombe loMpofu.
I-ZACC ithi phezu kwababili laba, ifuna ukuphenya usomabhizimusi uMnu. Wicknell Chivayo owayesebenza lababili laba kudaba olufanayo.
Babikwa bantshontsha imali kahulumende ngesikhathi bephiwe imvumo yokuthenga impahla yokusebenzisa ngesikhathi sokhetho besebenza lenhlanganiso ebona ngokuqhutshwa kokhetho eyeZimbabwe Election Commission lenkampani yeSouth Africa. OMnu. Chimombe loMpofu betheswa omunye njalo umlandu wokungaqhubi kuhle uhlelo lwembuzi, besebenzelana logatsha lwezokulima.
Your browser doesn’t support HTML5
UAnnahstacia Ndlovu Uyalandisa