Ingxoxo-mpikiswano yakuqala eyokhetho lukamongameli weMelika izakwenziwa ngoLwesine. Kodwa udaba lwabokuza kanye lokutholakala kowayengumongameli uMnu Donald Trump elecala lokufumbathisa unkazana okuthiwa waya laye amacansini yizo indaba ezisegudwini.
Izizalwane zeMelika kuzamele zimelele kuze kufike ngoLwesine ukuze zazi ukuthi okhokhela amaDemocrats uJoe Biden uzasebenzisa na ukutholakala kukaDonald Trump elecala kulingxoxo-mpikiswano. UMitch Landrieu, ongumgcinisihlalo womkhankaso kaBiden ukhulume ngaloludaba kuhlelo lwangeSonto olweMeet the Press olweNBC.
“Udaba ayisilo lokuthi uDonald Trump yisibotshwa, ngolokuziphatha kwakhe kanye lobuntu bakhe. Khumbula ukuthi wehluleka ukubhadala izikwelede kanengi nengi. Lokhu kutsho ukuthi ungusomabhizimusi ongalunganga njalo walahlisa abantu bonke ababethembela kuye ukuthi baziphilise.”
UTrump uyawalandula amacala lawa njalo wafunga ukuphikisa isinqumo senkantolo.UBiden ulungiselela ingxoxo-mpikiswano le ezivalele kodwa uTrump wakhetha ukukhankasa, ngempelaviki ubese Washington lePhiladelphia. Njalo eveze ukuthakazelela lingxoxo-mpikiswano kwezinye izikhathi ebuza abasekeli bakhe ukuthi aziphathe njani kulingxoxo-mpikiswano loBiden.
"Kufanele ngiqinise ikhanda na ngimtshele ukuthi nguye umongameli owehluleke ukwedlula bonke embalini yeMelika kumbe ngizinze ngimtshiye akhulume? Kuyafana na? Ngiqinise ikhanda?”
Okhangelelwe ukuthi uzamela ibandla lamaRepublican kukhetho lukamongameli usebenzise njalo umkhankaso wangoMgqibelo ukukhumbuza abavoti ukuthi umi ngaphi kudaba lwabokuza abangelamaphepha.
"Ngosuku lwakuqala, sizaqala ukuxotsha lababantu ngendlela engakaze yenzakale eMelika. Akula ngeyinye indlela."
UBiden kusikhatshana esedluleyo uqale uhlelo olwehlisa iziphepheli emngceleni osezansi yelizwe. Kodwa wasungula njalo eyinye indlela eyokuthi abokuza abangela maphepha abathetheneyo lezizalwane zeMelika bathole amaphepha okuba yizizalwane.
Kumbiko wakhe kuNBC, umgcinisihlalo womkhankaso kaBiden uphe uTrump lamaRepublican umlandu esithi yibo ababangela udubo lolu.
“Umngcele wethu uthwele nzima, njalo ubuthwele nzima okweminyaka engamatshumi amabili kusiya kumatshumi amathathu. UJoe Biden ngosuku lwakuqala wathumela ugwalo lokuguqula indlela okuphathwa ngayo abokuza kuCongress, kodwa abenzanga lutho ngalo.”
Ngaphandle kodaba lwabokuza, kukhangelelwe ukuthi uBiden loTrump bazabuzwa ngendaba ezitshiyeneyo kulingxoxo mpikiswani ezaphathwa yiCNN ngolwesine mhlaka 27 wayonalinyanga.
Udaba lolu luqoqwe yintathelizindaba yeVOA uVeronica Balderas Iglesias.
SEE ALSO: Lalela Okugcweleyo Ngaloludaba