Owayengumdlali womdlalo wevolleyball uThembinkosi Ngulube uthi imncintiswano yezikolo yiyo engavuselela lumdlalo elizweni.
UNgulube wadlalela amaqembu abalisa eleHighlanders Volleyball Club kanye leleDavid Whitehead njalo wayeyingxenye yeqembu elimela uBulawayo.
Uthi ubeyingxenye yabadlali abasungula iqembu leHighlanders Volleyball Club kodwa yena wayekhule efuna ukudlalela iqembu leHighlanders elidlala ibhola lenyawo.
Uthe elokhe esasengumntwana wesikolo wazithola esengomunye wabadlali abaqale iqembu leHighlanders ngo1987 ndawonye lomfowabo uAugustine, labanye.
Uqhubekele phambili wathi abadlali bomdlalo wevolleyball babebanengi kabi ngesikhathi bona besakhula ngoba inengi labo belidlala lumdlalo ezikolo.
Uqhubeke wathi ukungadlalwa kakhulu ezikolo sekudale ukuba babe balutshwane abawudlalayo kulezinsuku.
Ngomnyaka ka 1995 uNgulube ubeyingxenye yabadlali abaphatheke kuhlelo lokukhethwa kweqembu elimele isizwe kumidlalo yeAll Africa Games kodwa akasabanga yingxenye yaleloqembu.
Wenelise ukudlalela iqembu elimela isigaba seMatabeleland ngesikhathi edlalela iqembu leHighlanders kwathi lalapho esethethwe liqembu leDavid Whitehead ubeyingxenye yeqembu elimela inkabanzwe.
Ngo1999 uke waya kweleBotswana lapho abefunwa khona liqembu leBotswana Defence Forces kodwa akusaphumelelanga ukuba ayedlala khona.
Ngo2000 utholakale elomkhuhlane wamehlo oweglaucoma ocine umthathela ukubona njalo khathesi usengumfundisi webandla leLiving Hope Apostolic Faith.
Your browser doesn’t support HTML5
UJoseph Njanji Uyalandisa