Kuhlandla lethu lengxoxo-mpikiswano, sihlaziya ukubotshwa kwamalunga e-CCC ngeSonto edluleyo eHarare, wona athi ahlukuluzwa njalo atshaywa kabuhlungu esezandleni zamapholisa.
Amagqwetha abo alokhe elwisa ukuthi abanye bayehlolwa ngodokotela njalo bakhululwe ngemali yesibambiso eye bail.
Sixoxa loMnu. Munashe Mtutsa umabhalane webandla le ZANU PF obona ngogatsha lwe Information Communication and Technology (ICT) njalo elilunga lenkundla ye Central Committee yalelobandla, endawonye loMnu. Wesley Moyo, ilunga logatsha lwabatsha oluzithi ngolweYouth Task Force kubandla leCCC onguye osungula lingxoxo.
UMnu Mtutsa uthi kungenzeka ukuthi abathi batshayiwe bayazensisa ngoba befuna ukungcolisa ibizo leZimbabwe phambilini komhlangano weSADC.
"Angisoze ngikhulume ngakho ukuthi batshaywa kumbe abatshaywanga ngoba angikwazi, kodwa siyake sibone eminyakeni edluleyo abanye beqhula unyawo luka left kusasa bekhohlwe ukuthi kenje ulimele luphi ubone eseqhula oluka right, sikwejwayele lokho........," kugcizelela uMnu. Mtutsa.
Uqhubeke wathi amapholisa ayake abenqabele labo njengamalunga ebandla leZANU PF ukuqhuba imihlangano njalo bayalalela abakhononi, kodwa bedinge elinye ithuba.
Wengeze wathi kwakulembiko eyayibhoda-bhoda enkundleni zebulenjini ezokuxhumana ebonisa ukuthi abebandla leCCC babefuna ukwenza udlakela ngalelolanga baze babotshwe.
Kodwa uMnu. Moyo uyakuphika lokhu esithi kuzwisa ubuhlungu ukuzwa omunye ozithi ulwela amalungelo abasakhulayo ekhuluma amazwi abuhlungu abanye belimele njalo bebotshwe ngokungekho emthethweni.
Uthe kufanele uMnu. Mtutsa angakhohlwa ukuthi ubukhosi ngamazolo.
Your browser doesn’t support HTML5
Ingxoxo loMnu. Munashe Mtutsa Endawonye loMnu. Wesley Moyo