Owake waba ngu mkhokheli webandla le Citizens Coalition for Change (CCC) uMnu Nelson Chamisa namhlanje ududuze umndeni kamuyi owayelilunga lebandla lakhe, uMnu Murwisi Zwizwai esithi wadlala indima enkulu ekulwisaneni lombuso wentando kayiphikiswa kwele Zimbabwe umuyi uMnu Morgan Tsvangirai.
Ekhuluma esemzini kamuyi eWaterfalls eHarare, uMnu. Chamisa uthe lanxa uMnu. Zwizwai ebhubhe eselilunga ledale le Senate lapho abekwa ngozithi ungunobhala we CCC uMnu Sengezo Tshabangu, lokhu akulandaba ngoba wasebenzela ilizwe.
Uthe uMnu. Zwizwai ngomunye wabantu abaqala umzabalazo wokulwisana lowayengu mongameli uMnu Robert Mugabe ngesikhathi kusesabisa ukuphikisana lohulumende. Uthe kumele ahlonitshwe.
"Okokuthi wayeseku Senate akula ndaba. Sikhangela imsebenzi yakhe emihle. Thina savela laye khatshana. Wayefisa ukuba ilizwe lethu libe lihle yikho esimkhumbula ngakho’’
UMnu. Chamisa uthe kumele uzulu we Zimbabwe afunde okunengi ngendlela umuyi uMnu. Zwizwai ayezimisele ngayo ukulwisana lobuhuquluzi esebenzisa inotho yakhe.
‘’UZwizai ngimkhumbula ngezikhathi zakhe etshaya umsebenzi esebenzisa imota yakhe eyohlobo lwe Crescedor. Abanye bamazi engumphathintambo kahulumende ngokwakhathesi lokhu. Wavela khatshana’’
UMnu. Chamisa wethule imbali ka Zwizwai yena owaba ngu mmeli we Harare Central ephalamende kusukela ngo 2003 kusiya ku 2022, okuyisikhathi asebenzela ibandla le MDC-T, ele MDC Alliance lele CCC.
Uthe ukhathazekile kakhulu ngokwehluleka kokubambana phakathi kwenkokheli yezombusazwe elizweni esithi kumele uzulu asebenze ndawonye ukulungisa okuhluphayo kwezomnotho welizwe.
Usole labo abathi umuyi uMnu. Zwizwai ubesekela uMnu. Tshabangu esithi wayengumkhokheli owayebeka ilizwe lakhe phambili hatshi ezamabandla ombusazwe.
Imizamo yokuthola icele lika Mnu. Tshabangu ngokubhubha kuka Mnu. Zwizwai yehlule ngoba ubesemhlanganweni we Senate edolobheni le Masvingo.
Omunye umeli wephalamende e Luvuve owasebenza loMnu. Zwizwa kubandla le MDC Alliance nguMnu Discent Bajila.
‘’ UMnu Zwizwa ube eyindoda engathandi ukuxabana ubesithi lapho akhona kumele abantu baxoxe bahleke. Ube esebenza ngamandla kakhulu. Ngasebenza laye ngesikhathi se Congress ka 2019, ube engathandi ukuba kuxoxwe izinto eziphambanisa ilizwe lebandla efela ngaphakathi. Ube engathandi izimpi’’
Amazwi la agcizelelwe ngomunye umsekeli webandla le CCC uMnu Mafios Dube othi balahlekelwe njengabandla.
‘’ Silahlekelwe kakhulu ngoba ubeyinkokheli eyaqala umzabalazo we democracy njalo efuna ukuba siqhubekele phambili sisenza umsebenzi wokumanyanisa abantu’’
Umndeni kaMnu. Zwizwai umchaze njengomuntu owayethanda imuli yakhe njalo esenelisa ukubanikeza isikhathi ndawonye ngapho ephatheka kwezombusazwe.
UMnu. Zwizwai wathwetshulwa yingwe ngomnyaka ka 1970. Ubhubhe ngo Mgqibelo ekuseni ngemva kokugula okwesikhathi esifitshane ekhathazwa ngu mkhuhlane we tshukela.
Your browser doesn’t support HTML5
Udaba Silwethulelwa nguMlondolozi Ndlovu