Abancitntisa kukhetho lokudinga umongameli weleMelika, uMongameli Joe Biden loMnu. Donald Trump badinga amavoti abensundu. Intathelizindaba ye VOA, u-Scott Stearns uqoqe udaba elilwethulelwa yimi u-Chris Gande oluveza ukuba ababili laba badinga njani usekelo lwabensundu.
UMnu. Donald Trump utshele abavoti esigabeni se New York ukuthi wonke umuntu uzakuba kusimo esingcono nxa engavotelwa.
"Akukhathalekile ukuthi ungomsundu, ulithanga, umhlophe ngitsho lawuphi umbala. SingabeleMelika sonke, najalo sizandonsa sindawonye."
UMongameli Joe Biden utshele abalwela ilungelo labensundu esigabeni se Michigan ukuthi yonke imihlobo ilommeli kudale lakhe labaphantintambo, i-cabinet.
"Silabensundu, silabomama silabemihlobo yabalutshwana kulabohulumende bonke kumbali yelizwe lethu. Yikho sisenza kuhle kanje."
U-Trump lo Biden badinga usekelo lwabensundu kuzigaba ezingaletha umehluko kumpemula yokhetho.
Ucwaningo lwenhlanganiso ye Pew Research luveza ukuba okumqoka kubavoti abensundu ngalumnyaka yikuzithuthukisa kwezemfundo lomnotho welizwe.
U-Trump uthi uzafeza kokubili.
"Sizaletha impumelelo ezikolo. Sizaletha inotho kuzo zonke indawo eziselizweni lethu leli elilesizotha."
Umkakhankaso ka Biden uhuga abavoti abensundu ngomlayezo olandelayo owethulwa ngumkhankaso ka Trump:
“Mpela ngiyabazonda abensundu.”
“Ukuzonda abensundu okwenziwa ngu Trump akusonto entsha. Wasiwa emthethwandaba ngokwalela abensundu ukuthi bahlale ezakhiweni zakhe. Wakhuthaza lokubulawa kwabensundu abahlanu.”
U-Biden uthi u-Trump ulocuku njalo ukumvotela kuzalimaza abensundu.
“U-Trump kancintisi ukukhokhela eleMelia. Uncintisa ukuthi aphindisele. Ukuphindisela. Akusiyo ndlela yokubusa leyo. Awungeke wakha isizwe ngokuphindisela. Yikho ngincintisa ukuthi ngikhokhele ilizwe lingene kwelakusasa."
Ukungena kwabokuza elizweni yiyo indikimba yomkhankaso ka Trump awuthulele abensundu labavela kwamanye amazwe esigabeni se South Bronx.
"Abensundu bayabulawa. Abohlobo lwesi Hispanic bayabualwa. Kuthi izigidi lezigidi ziyangena elizweni lethu okufaka abensundu labohlobo lwesi Hispanic engozini yokuswela imisebenzi, izindlu lokunye okunengi nengi.”
U-Biden utshele abensundu ukuthi udinga usekelo lwabo ukunqoba u-Trump.
"Yini elabangela ukuthi u-Donald Trump anqotshwe, yini njalo elizakwenza ukuthi anqotshwe njalo.”
Kuminyaka emine edluleyo abensundu bakhetha u-Biden kulo Trump ngesilinganiso esingokungamatshumi ayithoba munwe munye lambili ekhulwini, 92 percent.
Ngenyanga edluleyo ucwaningo lwe Pew Research lutshengise leli nani lehlile laya kumatshumi ayi sikhombisa lasimbosi ekhulwini, 77 percent kwabensundu abangavotela u-Biden kulabayisilinganiso esilitshumi lasithoba minwe mibili ekhulwini, 18 percent abangavotela u-Trump.
Your browser doesn’t support HTML5
Udaba lwabavoti abensundu.